Wednesday 6 June 2007

微波碎步。

有一條歪理一直運行至今。

事情若然點去處理都不會扭轉敗局的話,倒不如撤手不做任何垂死掙托比較慳水慳力,對我而言,返工本身點計都算不上甚麼高興開心事,既然點轉都轉不去好心情,午膳一環都無謂花心思去選擇,反正食得再好返回公司都會換回死魚眼神,所以我養成微波叮飯習慣,懶得就懶、慳得就慳,這當然不是投訴住家飯味道不濟,只不過想表達「是但」之情而已。

每用一次微波爐,老上司總會提醒微波爐翻熱物多吃無益,好言相勸一番,但實不相瞞,要選出個人最愛食物種類的話,微波食品必定打入五強位置。

微波食品十居其九予我好感,全賴世間將之灌以唔正經邪道之名,沖減了我對食物基本要求,沒了要求,驚喜自然更易蒲頭。

要數歷史猶久而又深入民心的,必選點心拼盤無疑,想當年小學牙都未出齊每朝總會跟懶煮早餐的媽媽來一客趕返學,食得多自然有感情,唔識食講句,感覺比酒樓出品更強更勁。

點心吸引,但其實心裏頭最記掛的還是一系列已經失傳的微波食品,港仔初次認識潛艇威力跟鬼佬 Subway毫無相干,七仔跟公仔廠出產的芝士燒牛肉潛艇堪稱兒時夢幻食物,被微波叮至半溶的芝士,再加上毫不吝嗇的層層燒牛肉,大啖大啖噬之,箇中滿足感跟味道可想而之好得幾緊要,潛艇停產若干年後再次推出市面,但芝士減半、牛肉又沒了一大份,外澀中乾名存實亡,創業難守業更難,潛艇就守不住陸沉了;另外一款失傳微波食品乃真空包裝、一袋三隻的煙雞全翼,三隻一袋索價接近二十,貴但煙燻味又香又濃郁,三隻一人前都嫌少唔夠喉,何況還要一家三口將之攤分?雞翼出了無耐就告停產,現在牛龜咁大想番尋味已經成為不可能的任務。

近年微波界新寵必屬叮叮飯無疑,當中美心出品雖貴但最正最美味,汁多料好之餘,飯粒又能保持乾爽不糊口,比其餘波仔、龍鳯茶樓之類,小勝一個馬鼻,好味歸好味,但總覺得進化到飯、火鍋、煲仔菜已經有點走火入魔味道,始終太重型太大陣仗的,又好像失去了微波食品陰D 陰D 的樂趣,便利店版的星洲炒米、肉醬意粉其實已經足夠充撐場面,做得太正經太四正的話,客人會開始有要求的了。

港式出品出色,但講到微波食物呢味野,始終都係東洋出品夠五花八門有新鮮感,遇岩置地有機超市做清貨減價,所謂減價,並非八九折之類偽折頭,而係將平日閒閒地三四十的大割引到十元八塊,我呢類差不多連搭巴士都要有折先肯上車的,有咩辦法唔去襯下墟過過婆仔癮?



重申一次,日式冷凍產品絕對係超級超值,先說肉醬蛋汁飯,小小一兜平日在太古UNY 售三十多元恕我孤寒沒出手,現在這裏減至十四元底價,平了差不多一個骨,記得先前早早在UNY 超市八折慶典入手,蛋汁香滑肉醬甜酸有道,比起坊間港系日式店出品更高班幾兩班,現在機會難逢即時三數舊的拋上車,長久沒買衫購物心靈空虛,家下買番一袋二袋雜食填數,又達到平衡心理作用,早知的話,先前都唔駛洗咁多寃枉錢了。

日式中華料理一向非吾之所好,但小弟做人宗旨向來殘缺不堪,見日式担担麵由原價四十多減至十九元,宗旨原則又告全面淪陷破毁,担担麵湯底濃郁、麵條細滑之餘,急凍湯包還附有洋蔥、青椒、肉末等配料,適合我此等食公仔麵乾清九成湯之輩,夾撮麵喝啖濃湯,滿足感滿載,屬豪華豐滿版即食麵。其餘的還有大阪燒餅、炸芝士蝦餅、日式燒賣、麵豉拉麵等,全數超額完成令人食過翻尋味,當中尤以炸芝士蝦餅最為吊詭,翻叮炸物照計好食極有個譜,但叮完試完,又深感別有洞天。

太抵,今夜不設防的放肆大買特買,錢花得當然過癮,但案發日一夜之間被我左叮右叮全數食物燃燒胎盡才算最痛快最令人津津樂道,想起當晚一頓微波晚餐足足花了近二百大元,其實都真係幾無聊幾浪費。

No comments: