Tuesday, 20 February 2007

你今日Download 左未?

自從工作地點轉移至中環後,由於時間難預算關係,已經很少再有機會搭長程巴士。

沒搭長程巴士,最大損失莫過於失去看 Roadshow 權利,市面上廣泛流通討厭 Roadshow 擾人清夢、亂人思緒的人類,我都需要擺甫士,我都需要諗野,但我又要扮唔同,所以早早習得恰埋對耳絕學,需要時就聽,無需要時就繼續望窗,區區 Roadshow 此等些微音量,斷唔會干擾得到我呢類發夢王。

香港地方細,車程超過半句鐘的已經算是長程,所以 Roadshow 內節目大多精簡撮要,《明星紅人館》的明星專訪確實能夠滿足我呢類八卦友,但時間實在太短,很多時未享受到箇中快感節目已經嗚金收兵,欲求不滿的,所以要選最愛,必屬《手機十大音樂排行榜》。

只要見過我跟身那部中古手機就會知道,我係無可能會因為想 DL Ringtone 而動起收看念頭的,甚至乎,手機機能差到連 DL 都不夠資格。事實上現在手機用鈴聲隨處可得,用更低價錢換來更新歌曲大有店在,巴士上裝置的垃圾喇叭又普遍地十居其九有問題,乘客們會因為聽到糢糊單調拆鈴聲而一時衝動動起手機,可能性存疑。

其實我係被介紹歌曲前的開場白吸引到。

上星期主持人戴夢夢大概如此介紹第四及第二位歌曲:

「丫,愛係分好多種既,咁有種愛就係愛得好表面......第四位係衛蘭既,深愛。」

「丫,近排認識既朋友當中,有好多都喜歡上放假行山賞下花,不過香港冬天唔會落雪......第二位係泳兒既,花無雪。」

老實講,我聽後當場前後暗拋下單字粗口各一次,合共兩次。

真的很無聊,無聊程度直迫無記錄播各頒獎禮時,硬生生要周子駒在各環節作出註解總結。

究竟開場白講稿係由誰稿寫呢?我曾經懷疑該時段乃由各主持人自由發揮,但很快就否定了這個想法,事關《手機十大音樂排行榜》先後換了不少個主持,但基本上每個主持人所說的都大同小異,要我相信香港地有如此多惡趣味份子,我寧可相信有幕後槍手存在更為心安理得,有時我會想,慶幸槍手職業寫稿,假若換了做排舞老師的話,坊間恐怕會出現大量歌詞中有「我愛你」就作出食指先對著自己,再畫出心型狀,最後指住鏡頭的舞步。

依循上述推斷,魯振順自動榮昇幕後槍手最大嫌疑者,只要看倌們看過每年《歡樂滿東華》深宵環節《卡拉之星》中魯振順的舞步,就會明白我說甚麼的了。

3 comments:

said...

那些Roadshow我也情非得已下聽了,得啖笑。

Auchingying said...

聆聲倒數榜, 前排是蔣雅雯Manday主持, 我看過她xanga的blog, 佢講到好似佢自己寫架喎...d稿....

潤滑KY said...

Auchingying:
唔係掛?但係歷任咁多位主持d 開場白形式都一模一樣架喎。
或者可能係有一套守則,焗佢地講差不多既開場白啦。