幸福的旋轉木馬。

零七年二月十四日對於少女來說並不止於情人節那麼簡單，更是跟拍拖數年的男朋友結婚大日子，所以在情人節前一天，少女就邀請了在婚禮擔任姊妹伴娘的幾位好朋友到家中過夜，既可以商量一下婚禮中的細節，又可以跟幾位相識多年、感情要好的朋友共渡出嫁前一夜，別有一番浪漫。

預備好要準備好的，完成好出嫁前俗禮後，少女就在房內鋪上軟物，讓其中兩位朋友可以在房內席地而睡。

各就各位，關上房燈，自然就是四姊妹間談心時間了。

「時間過得真係快，眨下眼妳就話結婚。」跟少女睡在床上的朋友 A 說。「我地四個一齊返學放學日子好似無幾耐之前咋嘛。」

「係啦，最估唔到就係我地之中係妳結婚先囉。」睡在地上的朋友 B 咐和著。「記得當初最憎、最唔想結婚就係妳。」

「嘻嘻，咁人大左心態唔同左嘛，以前覺得一個人開心自由，但原來去到咁上近年紀，就希望可以搵到一個陪住自己一生一世的伴，咁而家搵到，咪結婚綁住佢囉，嘻嘻。」少女側著身說著。

「下？妳唔好話我知你想搵個伴先結婚咋！」另一位打地鋪的朋友 C 聽後不禁彈了起身。

「傻，咁梗係唔係啦，唔鐘意，又點可以每日對住？我先唔會咁蠢咁傻呀。」少女看到朋友 C 激動表現，不禁從心底笑了出來。

「咁其實佢係咪妳最鐘意果個呀？」朋友 B 問。

「唔...邊有話最鐘意架喎。」

「咁總有一個最深刻掛？」朋友 B 追問說。

「我覺得，最鐘意，唔代表最適合，最鐘意的可能已經錯過左，但我有時會想，我最愛的可能唔係過去的那個人，我最愛的可能是過去那段歲月，假若跟當年的那個人拖到現在的話，佢可能就唔係我最愛的那個。」少女就好像找藉口替自己辯解一樣。「總之最適合的，就係聽日將會跟我結婚的。」

三位好姊妹原先不過是多口問一句，想不到會惹出少女一席真心說話，是否一生最愛，大家心知肚明。

過沒多久，三位好姊妹相繼倦透睡著，就只有少女一個張著眼想事情，想著很多往事、想著很多過去的難忘開心事，當發覺當中只有小部份屬於明日的真命天子後，少女不禁滴出點點眼淚。

最適合跟最深愛，就是有這麼的一個差別。


另一邊廂，新郎哥同樣跟三位豬朋狗友出外渡過失去自由前的最後一夜，四條友屈在茶餐廳，邊吃著牛脯麵喝著奶茶，邊互相交出賽後報告。

「嘻嘻，聽日開始就要做番個好老公喇。」狗友向新郎哥笑著說。

「只限對住老婆時候。」眾人大笑。

笑畢，狗友們提著賬單走出店外結賬。

「衷心多謝你地幾位。」新郎哥多謝豬朋狗友們過去一直幫忙籌備婚禮，又多謝他們請客食飯，更多謝他們在結婚前帶自己到芬蘭浴請客嫖妓，真心多謝。

男與女之間的所謂浪漫，就是有這麼一個差別。