Tuesday, 13 February 2007

二月十一日情人節。

不論平安夜、聖誕節,抑或一家人的團年飯,出街食飯,要避過人頭湧湧、人多勢眾、廚房交行貨,甚至乎食物質素低於行貨的局面,縱然要冒上氣氛不足的局面,亦無可奈何地要將正日大餐推前進行,此等提早慶祝趨勢異常凌厲,做酒樓的朋友A更宣稱上年正日生意額不及偏日的多,可想而知,正日越來越唔似正日了。

最怕正日慶祝的節日當中,首選情人節,絕對唔係因為懶清高人做我唔做,而係對整間餐廳全數客人都是情侶之餘又要喫埋同一種東西有一種莫名其妙抗拒感,不知何故,總覺得此等情況有點像跟女孩子到百佳酒店時碰巧遇上另一對男女齊齊 Check In 入席隔離房的感覺,當然有男子漢會一句「等佢知我勁過佢條仔」而變得更加落力專注,但更大部份係怕尷尬、怕被人家聽到床第事宜而變得陰聲細氣、就住就住,咁咪玩得唔夠放、去得唔夠盡囉,咁鐘錢咪白白浪費左囉。


星期日跟夥伴到銅鑼灣購物一輪後,就選擇到灣仔 Al Dente 慶祝一下數日後的情人節。沒預早訂位,八點鐘左右就膽粗粗的 Walk In 一探虛實,雖云座落黑暗僻靜的謝菲道,但人客都唔少的,鋪細位多憂暗乃此餐廳一大特色,拿著戰利品又鞋又盛兩手都係的在窄小通道橫行,難免狼狽。



↑餐桌狹細,遂形成一副不甚大方的餐酒照。


點了一杯推介的白酒,很 Dry,入口淡淡蘋果果香,是餐桌上介紹紙的形容詞,其實自己一向對紅白酒零研究,就算店方倒錯孖蒸燒酒二鍋頭,恐怕都會懵然不知,照喝不誤,醉死都唔知咩事。

↑意式拼盤,每款食物多以一對為單位,有心人仕請視之為與情人的好兆頭。


拼盤有煙三文、兩款風乾肉、兩款芝士、燒茄子等,人腳齊全,二人分吃不會食至撐胃,但夠喉。當中比較有印象的要數燒茄士跟紅色的醃紅椒,前者略焦頗香口,後者則色彩鮮艷,入口前還以為會帶點辣味,但原來酸中帶甜,幾醒胃幾清新。


人少少要試多款小物的話,這個拼盤不失為好選擇。


↑是晚在銅記購物有所斬獲,心情之大好,從拼盤遺下的水印中可知一二。


店小,但用餐規格不馬虎,講的當然不是甚麼惱人的餐桌禮儀,而係侍應們服務態度一流,加上待人客完成整過頭盤後才開始煮理主菜一環,感覺良好,記得上星期到尖咀 Fat Angelo's時,店方一氣過上齊餐包沙拉前菜意粉主菜之盛況,西方式滿漢全席,令人吃不消。

蘋果推介燒肋排,份量大得令人咋舌。


跟夥伴見到燒肋排之派頭,不禁從心底暗嘩了出來,一客多達十二條骨,其中一半條條長達手臂,加上伴碟一大堆炸薯,單就陣容來說,已經比坊間眾美式大份餐廳超出多班。


豬肋排焗得微焦,屬可以想像的香口,最喜歡其肉質不會一叉即原條解體般病態,若干年前試過 Ruby 的燒肋排,一叉即鬆開尤如腐屍死肉,得人驚。呢科野有點像港式豉油扒,從來醬汁味道決定了整排骨所得大部份分數,Al Dente 的BBQ Sauce 有點像某肉乾店豬肉脯味道,好吃,但喫得多又太單調太悶,假若邊位二人分吃可以即席食得完一份的話,唔係讚你食量大,而係佩服閣下抵得悶。


其實伴碟的炸薯亦係不得了之物,新鮮炸起脆卜卜,如果唔係太飽太膩,呢味野一定早早被搶劫一空。

兩條友當然無本事幹掉得了全份,最後包走了三條大骨,可謂又食又拎。

↑四季芝士煮菠菜寛麵,餐廳叫 Al Dente,有咩可能唔點意粉?


寛麵跟豬肋排同期上場,傳出芝士香味完全掩蓋了豬肋排發出的燒烤醬汁味,跟夥伴注意力不期然被外表雪白濃郁的寛麵 吸引過去。剛煮起寛麵鋪了兩三款芝士,翻弄幾下後芝士慢慢被熱溶,忍唔住口執起湯匙取點醬汁入口,嘩,芝士味濃郁醬汁又滑溜順喉,跟夥伴係連續乾了數啖醬汁才開動喫麵。


原先看到寛麵濃杰賣相還有點擔心麵條會被煮得過熟變糊,到入口,憂慮一掃而空。寛麵口感就如店名一樣做得 Al Dente,捲起再沾上濃郁芝味白汁,又濃又香又滑,倆口子不禁放下焗得靚仔的豬肋排一邊,全心全意服侍呢味魔鬼一樣的寛麵,喜愛芝士的,絕對唔可以放過。

↑焦糖香蕉蛋糕,份量不少,適合二人分吃。


有理由相信甜品真係直溶入血管,無需經由胃部去消化。兩條友飽到反艇仍然點了餐廳 Recommend 甜品焦糖香蕉蛋糕,現在回想起來都有點難以置信。


嗜甜,但對甜品又係研究不多,香蕉蛋糕上半層乃忌廉跟芝士的混合物,香滑但沒啥甜味,要混合下半部的香蕉跟餅底才算得上完滿,焦糖聚在最底層的餅底上,量不多,蛋糕主要甜味來自熟透香蕉,對於飽到上眼白的我倆來說,不太甜的甜品又真係幾岩口胃,襯上伴邊雲呢拿雲糕,兩條友三扒兩撥就幹掉了全份甜品,厲害厲害。


吃畢,好需要坐定定飲杯水回氣,見餐廳客人走得七七八八,自然無需擔心生人霸死地阻人做生意,雖云餐廳地方狹小,但坐下坐下,又唔覺得係咩一回事,若然枱與枱之間能夠有多點空間的話,相信感覺會更好。


埋單連加一合四百餘,又酒又拼盤又意粉又大盤又甜品,點講都唔算貴,最重要食物質素高,值得擇個吉日再光顧。

名稱:Al Dente
地址:灣仔謝斐道153號地下

3 comments:

難渡怖山car said...

留腳毛!

潤滑KY said...

多謝難渡兄腳毛。

apple113 said...

恭喜你新部落入伙.