殘酷的浪漫。

平日香港市面上明明就係充斥著單身寡佬、深閨怨婦，但每到情人節，寡佬怨婦們彷彿都忽然得到上天格外開恩，紛紛在情人節前夕覓得短暫愛侶，唔係的話，點解年年情人節條街都會多情侶得咁緊要？

各旺區如銅鑼灣、中環、尖沙咀、旺角等地多人當然可以理解，但就連得個食字的九龍城同樣滿地係人，滿街係車，就真的出乎意料之外，需知道，九龍城以泰菜為主打，而當中能夠做到應節的餐廳，少之又少，新馬鞍餐廳、咖啡屋之類已經算最應節的了，其餘的，應佢個頭，跟本就係地踎麻甩餐館。

早吃飯，飯後散步於各泰菜街，眼見各泰菜餐館人客迫爆門外之餘，在人群中店方更僭建了數張摺抬圓凳做起生意來，探頭一望，見窩了幾對情侶在內用膳。

實在對女方一邊的賢良淑德深表佩服。

情人節流流，要等位已經大為掃興，千辛萬苦等到位要踎在路邊用膳之餘，還要在眾目睽睽下吮蟹吃生蝦，有咩辦法唔寫個服字？在煩囂都市中一對情侶愛情飲水飽地享受著窮人式浪漫，請擇個吉日在家中電視藉 DVD 播放出來，現實生活，還是現實一點比較好，男方用上汽水蓋套在女方無名指求婚，刮損手指比成功個案更多，就算真的完成大業，深夜纏綿過後枕邊人總會加番一句「聽日記住買番粒真鑽石過我喎」掛？嫌港女太現實的話，請將心比己，要是閣下生日收到女友手繪 A4紙製成紙領呔，你又可以衷心說聲多謝而無需交戲嗎？

我認為，情人節晚餐從來並不限於西方晚膳，但就一定不包括迴轉壽司，放工時路過峰壽司，赫見等位人數比平日還要多，不禁暗暗嘀咕何以門外客個個牛龜咁大、有頭有面仍然要幹上此等勾當，坐 Order 檯還算好一點（其實都不能接受），坐迴轉檯的諗起就論盡麻煩，右髀跟意中人左髀緊貼當然溫馨，但請勿忘記其右髀係貼著另外一個陌生人的，而閣下左髀又好可能貼著另一位陌生人，這種層層相連，有一種雜雜交往感覺。

女方聖旨頒落非燭光晚餐不吃難免有點任性，但假若只要求選擇一個傾到計、坐得好好地的食肆，亦算不上摘星任務，何況一年才一次，踎街食飯其餘三百六十四日都可以，點解一定要二月二十四號？除非閣下非富則貴，去 Spoon Felix 用膳尤如家中炒蛋灼菜，咁就有資格去柴娃娃鬧著玩。

最後容許我兜一兜：
其實只要兩個人真心喜歡對方，日日都係情人節，食咩收咩都唔緊要。


童話書寫的。