全九龍城，開店率最齊全就是泰國餐館，原打算到泰式粉麵之王同心一嚐其巧手鴨肉湯河的，但見店裏人煙沸騰，無謂入內望著人堆獨唱「樓上有人雙雙對對，樓下有人好鬼悶」，就卻步轉戰年前幫襯過、撚手炒金邊粉的小店光顧，入內見店內盡是泰國鄉里，不知何故感覺反而變得更加自在。
↑師父心情靚，是晚螄蚶份量特別巨大，一人獨吃實在太多了
本人作為螄蚶狂熱者，到佳節當然要放肆一下獨享一客大快朵頤，只見數十粒可愛小伙子堆在碟上充著血水腫頭飽滿的向我連聲「恭賀新禧」，實在不得不即時手起嘴落向各弟兄血紅小嘴啜番一啖，沾上辣汁的螄蚶鮮味得到額外加乘，就像生蠔與嫩蜆之魔鬼化身，又嫩又滑，令人不禁一隻接一隻的不能自拔。
店方選用之螄蚶有大有細，望落充滿光澤呈血紅健康色水，不用懼怕誤吞穢物嘔吐大作，起碼自己是晚生吞了整客數十粒依然安然無恙、無病無痛，新鮮程度有保證。
白灼螄蚶一客才三十八元，屬個人一見必點菜式。
↑相對曼谷街頭雞飯，這裏的海南雞飯就略為遜色。
齋食生冷野感覺差，自然要點樣主食才像樣。
命名為泰式雞飯還可以接受，但就真的很難明白為何逢泰國餐館總會有海南雞飯一味，感覺有點像 Outback 忽爾屁股痕癢將爆谷蝦改名為蝦餃一樣，明明就好像風馬牛一樣互不相干。
此處的海南雞飯雞肉去骨，不嫩不滑但有雞味，感覺有點像住家白切雞，食味不差，但又想不出再嚐理由。鋪底雞油飯味道適中帶點硬身，對於我呢類受硬唔受軟之輩，更覺飯比雞出色，見螄蚶殘殼剩餘點點血水，就將之混飯吃，想不到風味更佳，若然將白灼螄蚶半份起肉混飯吃，將會是另一番美好光景。
完事，飽到上心口的喝著泰啤回氣，聽著各鄉里不停互道恭喜發財，估唔到年初一流流聽得最多恭賀說話全出在泰人口中。埋單連兩枝泰啤合一百零五元，十八元一枝細樽裝泰啤實在太貴了，下次都係要枝大青島比較划算。
滿身飽暖，即時跳上巴士歸家，繼續屈在電腦檯前看日劇過日辰。
名稱：昌發泰國粉麵屋
地址：九龍城城南道27號地下
1 comment:
乜宜家仲有地方食到螄蚶O架咩?
Post a Comment