Friday 3 April 2009

忘記未吃喝會肚餓吧。

搞活動Event,表演嘉賓之類確實要精挑細選,而選擇廣告代言人同樣不可以求求其其、馬虎了事,就好像最近推出的一輯廣告,我就很佩服日本藥廠有無比勇氣請韜韜助陣了。

禮拜流流自己一向出街指數甚高,韜韜擔正的《日日有食神》是否如斯精采受歡迎不得而知,但衷心懇求有關方面介紹食店節目真的要適可而止、見好就收。咪誤會,我並非嫌此類節目太濫做成悶場,相反,自己都算半個愛吃之人,看介紹食物總好過看一堆陰陽怪氣的師傅在玄學掌相一番,但手心係肉、左手又係肉,秘店美食一旦被揚開,平日大模斯樣見位就坐的精巧餃子店,轉眼間就變成不分晝夜門外皆捲了六層蛇餅的人氣正宗餃子王,再精巧包製的餃子,都被消化不完的人客慢慢塗化成工場式生產了,盤古初開的賣點從此就被慢慢淡化了,而吃開的老食客,就要花多六十分鐘排隊去享用餃子,擾民了。

介紹本意係好,但好心做壞事。

我其實不介意排隊,但經人手加工出來的隊列就萬萬不會就範,就好像《日》裏韜韜介紹過的澳門魚翅大碗麵,作為一家人一年過大海總數達百餘次的成員之一,真的敢用人頭擔保此店未介紹前真的是無人問津瀕臨摺埋的,但一經介紹數日後路過,全店爆滿不特止,店外還擠著數十名慕名而來的港客,離遠眺望此等盛況,跟老哥搓搓雙眼,差點沒以為是店鋪沙漠化得太厲害出現了海市蜃樓。

所以話,情願好東西細水長流慢慢被發掘,都好過因忽然成名負擔不了人流而影響質數。

走回正軌,近日都太懶了,禮拜選擇安坐家中呆呆的過活享受著時間流逝,恰巧電視播著韜韜為白兔牌賣的廣告,好奇望望,赫然發現韜韜代言的竟然是一款降膽固醇的藥物,心不禁離了一離。不知大家有沒像我一樣錯左的洞察力,當韜韜在《日》中吃著喝著介紹著的時候,桌上美食再誘人也好,不知何故自己總不能避免的將一對賊眼聚焦在韜哥那個滿有褔氣、充滿安全感的大肚脯上,看著大啖食物後又進一步添置重量的巨肚,不期然好奇著若然現場不幸地出現割肚狂魔的話,韜韜圓渾有勁的巨脯慘被割開,箇中流出來的到底會是甚麼?除了龍躉星班黃臘倉之外,大概就是血液脂肪膽固醇吧?我不是醫療専家,膽固醇高低與體重身形有沒直接關係沒太深入研究,但從外表宏觀點去看,韜韜的膽固醇大概都不會算低吧?我甚至認為他的膽固醇含量已經到達岌岌可危、幾近需要大修之境地。

或者廠方抱著減肥廣告找胖子做代言人以證實力的例子為選人對象,但人瘦了外人看得出成果,膽固醇低了的成果是怎樣,單憑肉眼又唔係話睇就睇得到的,所以從尋常人的認知力去考量,最終還是走回舊路,以身型作為評審準則。

一隻韜韜都有食的降膽固醇藥,先天性就讓人覺得效用成疑了。

所以話,白兔牌肯找這樣的一個人去拍降膽固醇藥的廣告,真的是勇氣可嘉啊。

10 comments:

moon said...

哇哈哈哈哈哈哈哈哈哈哈哈哈哈~~~~~~ 你講中左幾十萬人心裡的說話. 都唔係心裡, 其實我同朋友同事間都有講&爆笑.一講出黎, 大家都十級認同, 同樣擔心佢爆肚會點. XXDDDDDDDDDDDDDDDDDDDDDDD

SZE said...

我第一次看那個廣告同樣地打了個突,不過再想一想,或者白x牌是想証明如此的高危人仕也別這種東西,而且到現在仍未心臟病發死左喎,所以証明那東西是有效的.

唯有這樣假設吧!

浪子m: said...

搵佢賣廣告搞gimmick

袁健健 said...

moon:
佢個肚真係搶哂風頭。

SZE:
我覺得兔兔牌有勇氣係因為,家下係未死,但睇佢個狀態,咁搞落去真係死神就來了,萬一代言後一個月訓低左,兔兔牌呢隻藥就聲名狼藉,摺得的了~

mingmanfred:
很冒險的噱頭~~

仕仔 said...

見到件健講韜韜, 就不其然令我諗起呢篇野

如無記錯,呢篇應該係我睇你blog的第一篇呢.

嘩嘩嘩, 簡直係史前既事. -_-"

仕仔 said...

link 錯, 應該係呢篇先啱.

袁健健 said...

仕仔:

三年喇祁~!!
真係彷如隔世呀~~
想當年你重有留言添喎~
不過麻煩你都勤番少少啦,好耐無update喇你~

不過...

以前d 行文風格而家睇番唔係好慣。

仕仔 said...

係呀! 三年喇健 !

果日仲係度諗, 每年同你講生日快樂, 心裡頭都會響起一句, 嘩, 乜過得咁鬼快架啫, 眨下眼就又一年喇喎.

你唔慣自己以前d行文風格 ? 總之就以前有以前搞鬼, 依家有依家好睇啦.

至於我好耐冇update呢件事, 又係一句, 寫有寫既開心, 但唔寫都有唔寫既自在bor. 等我享受一排呢種自在先啦.
不過, 你呢度我都日日有睇既. ^^

袁健健 said...

仕仔:

咪係~咁就聽左你句生日快樂三年喇,
重要我休業年幾期間你都無遺忘到,
實在太太感動~~

確實,唔寫的日子美好又自在~
尤其對我呢類懶人,簡直係享受~
而且我寫blog效率好低的,
好浪費時間~所以近排我都諗住再休息~

你寫番的話單聲,
搞個你寫開頭,我寫中段,
各有各結尾的活動啦不如~

Anonymous said...

昨晚播出滔滔還扮企鵝.笑到我地一家人像看家有喜事.他的肚真太太太太太大了.
現在美食推介氾濫那疑似美味店鋪真是看得麻木所以都是睇完就算!