Friday 20 March 2009

The Making of 《Plainfaceangel x Noisykinkin @ Blogspot.com》。

嚴謹而認真的籌備過程,成就出一個美輪美奐的聯名企劃,但掃興的講一句,背後其實係一個無咩誠意的飯局。



鹿嗚春單計食物的話,價錢確係相宜,但酒水之類,又並非鬧著玩的,三位女將飲酒有技巧可以少有少飲,可憐本人屬於追酒飲的沒技巧者,杯一滿就飲,空了就斟,斟滿左又飲,周元復始,好貴,咁當然,在座幾位大人大姐講貴又唔係話貴到山窮水盡無錢比,但,叫個餸才五草,一枝青島就要三草,飲得來頂氣囉,所以四口子一致裁定到附近來一頓飯前啤,爽一爽。

所講的四口子,除了我之外,還有Blog 界女神素顏、惹人可愛的PY氏和背景不便透露的Miss C,雖然這個陰盛陽衰的組合早在《三娘教子賀牛年》出現過,但有幸再一次成為是晚大會指定男優,已經值得暗喜,加上清楚知道幾位女仕在網絡界坐擁著不少男粉絲,心裏頭自不然萌生出一種不知嬴了甚麼的異樣優越感,登時暗喜過頭,狂喜了。

講得好像很淫亂,講到尾,其實都係食餐飯。



四口子聚首於尖咀 La Tasca,摸著杯底齋吹齋飲口寡寡,素顏就提意點些 Tapas 來過過口癮。

「唔駛問我,我有少少飽。」PY氏撫著肚子身子向後一攤,單單這個作飽狀的可愛動作,就已經夠格作為PY氏新専輯的封套相片了。

「呀?飽?」素顏提著餐牌作驚訝狀,假若素顏這個迷人的驚訝表情被改造成MSN 上「呀」字的動態標示,相信上網下載人次都不會是少數目。

「一陣要為全香港唔食飯的排骨青年人作榜樣喎,你身為企劃團員點得唔以身作則呀?」

「我黎之前食左少少野嘛。」PY氏一臉尷尬的說。

「食左咩呀?一陣鹿嗚春我訂左成隻填鴨喎。」Miss C 一臉認真的說,真箇是散發著點點能幹女性之味啊。

「...Outback。」

擺明飯局仍然帶飽上陣,無誠意無誠意。



飲酒來說對手真的很重要,假若打對的滴酒不沾的話,係好難發揮到最大的飲酒潛力的。

「喂,就無喇,叫多杯啦。」見Miss C 好不容易完成了首發一杯,就嚷著替其加酒。

「唔好喇,夠喇。」平日愛喝的Miss C 竟然出言推塘,這就好像本部落格文章忽爾變得簡潔一樣,全宇宙賴以運行的黃金法則難道已經崩壞了嗎?

「咁快唔要?」我愛飲,所以總喜歡監人家飲,當知道戰力最強的Miss C 投降,不禁有點懊惱。

「唔喇,唔係好舒服。」

「有咩唔舒服呀?」素顏跟PY氏兩大單位攜手關心,羨煞旁人。

「唔駛擔心,無咩野,係尋晚上左大陸又揼骨又搓又盛,家下散散地,我驚一飲會頂唔順發哂病出黎。」

「唔係掛?你家下窮到要上去撈野咁慘?」

「頂,我係比人揼果個呀。」

「車,明知今日有局,就咪鬼揼啦衰人。」

「上到去梗揼,最多今晚齋食唔飲。」

擺明飲局仍然抱齋食唔飲心態上陣,無誠意無誠意。



最遲到達飯前啤會場的,就係小弟。

「袁生,你終於捨得黎喇,早左喎。」Miss C 言語間泛起暗諷之意。

「哈哈,遲左少少遲左少少。」

「勁,遲左粒鬆個鐘都可以對外宣稱係『遲左少少』,面皮唔薄喎袁生。」相比起Miss C,素顏就來得更直接。

「算啦,好左,我原先諗住佢係食飯先到的。」連可愛的PY氏都來一記明撫暗頂,總括而言,相互之間都很客氣,唯獨對我就很不客氣。

「咁,唔知醒,人人都試過唧,小事一宗唧,人之常情唧。」

「...呀袁生,我地係約你6:00pm 囉唔該,你好似住Kowloon 咋喎,唔係住L.A 適應唔到時差喎。」

「鬧鐘失靈嘛...」

「頂你約你六點都要較鬧鐘,你就真係失左靈。」

擺明有局仍然訓到黃朝白晏,無誠意無誠意。



是日最有誠意的是素顏,但奈何表現依舊沒令人滿意。

其實應該這樣說,係沒令我滿意,無他,在La Tasca 飲了啤酒,又到鹿嗚春喝了陳酒,最後再到798 喝了紅酒,但依然沒出現《三娘飯局》中的迷糊眼神,沒迷糊眼神的素顏,就好像設有隔臭裝置的臭豆腐専賣店一樣,醉人魅力不得彰顯,風味大減。

下次再聚的時候相信要買多數款不同的酒類物,才能Chok 出素顏的迷糊樣來。



話說飯局翌日,PY氏在Plurk 內訴說胃酸之苦。

「是日有胃酸,辛苦。」

「唔係尋晚食得飽得滯呀?」

「相信都係喇。」

「咁下次打冷 + 囍宴飯局唔駛預你喇。」

「咁又唔好。」

「你胃酸唔食得多嘛。」

「我之前食少少野打底咪得囉。」

「你尋晚餐Outback 唔係打底用架嘛?如果係,你個底打得真係太勁,打到飽左。」

「...藐。」

藐字有沒諧音意思,就無從稽考了。


PS:話說回來,其實這篇所謂的Making of 本身都很行、很沒誠意,最重要係,正文依然係未打過一粒字,面臨流產了。

8 comments:

Anonymous said...

「...呀袁生,我地係約你6:00pm 囉唔該,你好似住Kowloon 咋喎,唔係住L.A 適應唔到時差喎。」

哈哈哈~~~~~

你地一晚可以食幾餐咁勁.....!!!

Anonymous said...

有強姦,無侷blog。

袁健健 said...

SZE :
飲野唔計,甜品同正餐又分開左兩個胃,
差不多了~

難渡兄:
好久沒見呢,近排有冇咩好介紹?
呢排無咩心水。

我個人一定要侷,唔係我又會無限期休Blog的。

Anonymous said...

嘩,你咪誤導依度日益壯大的讀者群;係無見過!

心水?你咁神化,好難捉到你路嫁播。

袁健健 said...

難渡兄:
哈~搵日聚聚就唔係誤導~

壯咩大丫,來來去去都係果三四個人循環咁睇~

我要刺激,但唔要皮肉既刺激,
要意念上既刺激~~

Anonymous said...

野外捆綁人獸5P幼齒制服同志亞洲無碼arm5arm?

Anonymous said...

嘩, 難渡兄, 你今多條la唔走(eg. 鱷魚條牙la,升降機條門la...), 你竟敢走法律la !!

袁健健 said...

難渡:
正!!!
剛岩睇完《大冬瓜》對神話人物造型特別感興,
你即刻整張神話制服誘惑圖片出黎祭我脾胃,
難渡果然係我肚裏面條虫!

仕仔:
岩岩起身睇到D 咁野,精神哂~