Wednesday 4 March 2009

沒有可能繼後香燈了。

「你睇你睇,呢個咪我個囝囝囉。」鄰座的同事D 搖一搖我正在托著鰓的右手,忽然在電腦開出一張嬰兒物體的照片,很老實,我完全沒有興趣去看。

一個人平日再內歛再不多言也好,只要成為人父人母,慣性都會沾染上兒女就是可愛候群症,將己出定為桌面圖片實屬家常便飯,放到公司一枱都係生活沖涼照的更加屢見不鮮,這當然,人各有志,加上自己未曾經歷過人父這條人生路,雖覺匪夷所思但仍然係會予以尊重的,但問題係,這還不特止,那一份育嬰的喜悅,還要不停跟身邊週遭同事分享,一朝到黑皆不停自個兒陳述著一堆她跟囝囝的所謂趣事,跟一眾師奶同事討論還可以理解箇中交流心態,但向著我這個擺明就沒啥愛心的人肆意分享著,就真的令人摸不著頭腦。

我聽在耳裏既沉悶又要嘻嘻哈哈扮有興趣的交著戲,感覺就好像每一刻都在見客應酬一樣,我連自己都就快不見了。

「唔好睇佢得幾個月大人仔細細呀,我叫佢個名佢都會『丫丫』聲應我好得意架~」同事D 說著又望一望電腦桌面的嬰兒照,就「卡卡」聲笑了出來。

「幾年前我幫親戚暫養果隻松鼠狗,叫佢小白佢都曉搖住尾走過黎。」我點著頭「係咩?咁勁?」的應對著,心裏頭卻是前者那回兒事。

人家盛意拳拳邀請觀看愛兒大頭照,人身在世免得失,再沒興趣的都應該稍為敷衍一下,我裝作期待已久的探頭一望,嬰孩一比一的大頭照映入眼簾,看著看著,輕皺眉頭,深諳遺傳學的奧妙。對嬰兒有若干惻隱的對著如斯頭像還可以彈出一句半句模稜兩可的中性說話出來應酬一下,但看在討厭細路族群的人眼裏,就真的很難掩著良心說大話了。

我對小孩子抱著甚麼態度,看舊文總可略之一二,簡言而之,就是一個討厭細路、對細路又沒太多同情心的人,可愛的,當然會珍愛的抱多兩下、讚多兩句,但遇岩面目憎獰、討人打的,又真的會別開面一言不語,過去自己就曾經出現過數次整蠱街邊細路紀錄,雖則無傷大雅純粹鬧著玩,但看在當時女朋友眼裏,都得到一句「你個人都幾變態」評語的。

嬰兒太瘦的話,傳統上都很難稱得上可愛,而同事D 的這個,就好像跟非洲土著混種一樣,乾乾黑黑,瘦得有點饑民感覺,看著看著,稱之為可愛可憎都有若干點不到題,呼之為可憐的話,就更為貼題拎足分了;據家中睇十年仍然未睇得完的心理學書所說,嬰兒生得眼大大乃避免給生母拋棄、吸引人哺愛的天賦才能,莫見我今時今日死魚眼細得碗豆一樣,想當年孩提歲月都有被稱為大眼仔的輝煌紀錄的,而放眼相中這個小嬰孩,眼白多而眼珠小、眉毛密而眼睛細,天賦機制都沒有了,蘇師傅有云,此乃不討人愛之相;個人信條,嬰孩沒頭髮才是王道,退而求其次的話,直髮又比曲髮為佳,而跟前的這個,又正正頭髮厚得到達臨訓要吹頭地步,加上線條曲得呈歷蘇狀,真的完全沒有惹人憐愛的條件。

「你睇你睇,呢個咪我個囝囝囉。」同事D 就好像迫著我表態一樣不停進迫。

「嘻嘻...囝囝你都好醜樣下喎。」我嘻皮笑臉的對著螢幕照片說。

「係呀係呀,好醜樣呀你。」同事D 篤著螢幕,狀甚幸福的說。

雖然嬰兒沒有習得引人哺愛的天賦才能,托賴社會還有「BB仔小器」這個規條制衡著,否則現實中多幾個我呢類冷血人的話,血案棄嬰案就要增加了。

8 comments:

Anonymous said...

- 有d大人話bb細個醜樣, 大個係會靚架.
睇下我依家個樣, 我覺得都幾0岩. XDD

- bb都未算討厭, 最煩既反而係d大人明明係大人聲, 每當對住bb, 就會用d細路聲同bb講野, 又或者係街度或者港鐵裡面撩人地個bb玩, 又擠眉又弄眼又扮鬼臉, 可能我係無d愛心既人, 我真係無辦法明白d人點解對bb有咁大喜好, 我見到bb, 都係木無表情. -_-"

Anonymous said...

早期link link下左泥呢到,發覺幾好睇喎,所以而家周不時update下!

我係睇你呢篇先link先知你個舊blog,
原來o個度都好多野睇喎,
我成日一路睇一笑..haha!~

仲有o個篇咸故,
唔算露骨呀,我覺得寫得幾有美感tim..

繼續努力呀!

Betty said...

我都唔中意细路, 好怕D 人系甘讲自己仔女点可爱点可爱.

因为我觉得大部分BB, 都系生得唔可爱既.

袁健健 said...

仕仔:
咁查實你細個醜樣定靚樣呀??

細路聲其實我唔mind 的,但好無奈我係扮唔到細路聲果種人,即係會用牛聲同細路講野,
咁d人會覺得我惡~
簡而言之就係唔識點應對細路果種人~

Cat:
真謝謝~

近排成日聽到「碎料!」「多鹽!」「咸d!」「唔夠咸!」「作咸故!」「你除左咸野其他野好悶!」既投訴~~
我估唔到憑文字大家都知我真性情,
蓋都蓋唔住。

小瓶子:
小講我可以接受,
但多講密講我一定「嘖」~

Anonymous said...

咁你係寫得唔錯呀嗎,自然多人想睇la!

我覺得你將成個過程寫得極詳細..haha..我一路睇..完全幻想到個畫面!!

所以..我覺得你對女性身體有一定程度既認識同了解~~^^所以先可以寫到嗰程感覺出泥~

袁健健 said...

CAT:
「所以..我覺得你對女性身體有一定程度既認識同了解~~^^所以先可以寫到嗰程感覺出泥~」
......
聽你咁講,
我忽然覺得自己好賤格添...~

素顏天使 said...

袁健好多女 fans!!!!

Anonymous said...

"咁查實你細個醜樣定靚樣呀??"

--見仁見智啦 ^o^