Wednesday 14 January 2009

幕後花蕠。

是咁的。

素顏寫了,自問文筆無可能跟那邊廂硬撼,就來一個幕後花蕠是是但但交交差,以免有人在素顏Blog 誤闖進來,一句「車,年幾無Update ,廢墟出廢人,豬狗不如。」,敗興而回。

全港數一數二凍的某一日,正是邊爐人出動之時,多得陳小姐作搞手話事人積極斡旋,小弟才得已有幸跟堪稱Blog 界女神的素顏跟才子積奇來一個浪漫露天火光邊爐局,現在回想起來,都真係要感番兩三次恩才對得住各位素小姐和積奇孱的粉絲。

搞呢類網局,必需具備一個半個具警犬精神、懂得揳而不捨兼具恆心的熱心市民才能成事,就好像今次這個看似即興、但實則講足幾日(上一個三人局甚至講足一年)都得個桔的爐局,個期真係一改再改再二讀才三讀通過的,大家又唔係甚麼億萬富豪要日理萬機,因乜解究食餐飯都要同秘書Book期一樣,搞呢搞嚕搞一場大龍鳯才成事呢?

咪先,大家咪誤會,並非素顏大枝野又或積奇孱真係人如其名Jacky Chan 一樣咁大個鼻,萬惡根源係我,袁健是也乎。

相信過去數星期每每提起此次爐局,上述三條友都不止三來次在不同情況不同環境下彈出「乜得呢條友咁叉煩?」來替我洗塵一番,甚至到Firm 實一刻,仍然有人以食花生心態觀望是次爐局,我一向承認亦無從否認,無錯,我真係好叉煩,煩到一個地步係,夜觀天象發現南星光芒暗淡,咁是晚就不宜打爐宰羊囉;又或星期五要考試,咁打後個星期日就不宜躝街。既非迷信又非有心玩野,就係因為麻煩,僅此而已,就等同痴線佬殺人放火無數講一樣,世間上最難搞的事就係無厘啦更,一件事根本沒有問題,試問又可以化解些甚麼?加上一向被素陳兩美女貫已宅男之名,不擅交際可想而知,可憐的陳小姐對住我講到火都黎埋,最後想出以台灣特產「杏仁豬肉紙」作人質才放煙焗曱甴一樣焗得我出,真係好波,不過講開又講,番歸撕開豬肉紙密實貼窺探兇案現場,嘩,案發現場碎屍遍野碎濕濕,飲可樂式手勢試了幾口,又香又脆又甜又碎,真係幾掂,在此特意謝過陳小姐。

說回是次爐局,打爐三句多鐘其間,自己就曾經試探局後再去周記啪油渣麵的可能性,感覺其實就跟食完自助餐,有人提意去食甜品一樣戇居痴線,但無計,一向愛玩挑戰極限之類玩意,雖云最終一句「痴x線」無價講,但後尾來的兩轉甜品局亦同樣令人暗暗雀躍,絕對快樂發心內。

哈根大師近日又推出一個鐘頭任食優惠,究竟一個人雪榚限界係幾多球呢?我認為成年人計,十五球應該係最低消費,不日一定要驗證一下。

想講的未講,有緣待續。

7 comments:

素顏天使 said...

blog 界女神, 乜咁多謝 XD

j said...

我吾係才子,我係文化垃圾。

Cherry said...

「加上一向被素陳兩美女貫已宅男之名」

問題一: 我不是美女
問題二: 你唔係宅男,係解唔到毒嘅毒男

杏仁豬肉紙真係好好味...期待ing 5月先有嘅「季節限定」杏仁櫻花蝦紙

以果晚我可以大到你一路行去大良果時面都青埋嘅氣勢,我諗去挑戰哈根大師我都未必會輸...

Anonymous said...

四個食鑊的心。

Anonymous said...

難渡兄<--和一個八卦的人 :p
噢~~我留了言, 咁就兩個八卦的人啦, 哈哈 ^O^

袁健健 said...

難渡+祁:
0係我心目中個飯局係開埋你地兩個個位,你地既精神亦長存窩中,所以你地都唔算八卦。

Anonymous said...

係囉,下次擺定兩個橙,係噉咦係上面插枝香笄腳,求其望到下尐餸就得嫁啦!