Wednesday 7 January 2009

在阿拉伯晚膳。

一年總有一頭半個月特別懶散頹廢,有美女飯局諸多推塘、一星期逃足兩次學都唔緊要,問題係無無聊聊行到學校門口,嘔吐感忽爾由胃部湧上直迫天靈蓋,急急腳走番轉頭坐巴士番歸,窩在家中睇沒追開的《Click 入黃金屋》,唔駛問阿貴,排外病又發作。吃著喝著又看著黎耀祥跟狐狸調情說愛,演技再好再出眾都好,綠葉就係綠葉,即係麥包就係麥包,要改造成麥長青唔係未試過,但拉牛上樹,人攰死牛痛死,傷亡慘重。

雖云排外,但聖誕假期舉目無親,飯總係要放入口的,某晚適逢友達打來相約飯局,推又推不了,訂立一程巴士廿分鐘內可到達要求後,就又求求其其的笠件衛衣戴頂帽,揚長而去。

廿分鐘去得邊丫,咪就係APM 囉。

APM 配套設施幾可跟九塘又一城齊名,兩者不約而同的無野好行,亦同樣對抗潮流地無野好食。其實APM 近年開了不少新食肆,但卻總令人沒勁去嘗試,記得年前就曾跟一眾舊友到經已收皮的Roma Roma 聯誼,果一餐,一堆人N年沒見已經有夠生保,餐廳食物更係差得直達餵狗都會比狗咬地步,眾人食完要行死刑一樣死氣沉沉的享用著最後晚餐,摺埋可謂眾望所歸。

友達一心想到最頂樓的新派火鍋Hipot 試試,登高一樣上到雲頂,頭海盡收眼簾,天下間最不能等的除了浪子回頭外,就是火鍋店和自助餐了,登高前路經Table 18 見有點情調總算正正經經,又就撞門而入。

兩口子就坐,少女侍應前來表示可以介紹一下撚手菜,一嗡,就係五分鐘,而這生命中宂長的五分鐘揚揚百字,實則十一言既之曰:我地廚師煮咩都係撚手菜。托賴店方沒撚手水吧員,否則店員講完,自己已經要幫襯番杯,貼錢打工了。

跟友達一輪商討,就點了幾款分著吃。

申報:全數相片用130萬像數手提攝製,質數無謂多提。

由於經過店方專業推介後剎有戒心,跟友達一致認為煙三文魚沙拉最多穩陣妥當。沙津上桌,三大塊煙三文魚呈玫瑰狀在眼前,份量尚算滿意,呢味野,對於一個年多兩年沒寫食評的人來說,又可以用甚麼詞令將之精采化呢?買番屋企拆開包裝紙滴數滴Olive Oil,你我都可變大廚;一向鍾情凱撒沙拉,所以見這款沙拉並非理想中的那款菜,就難免開不了心,但一切還好,總算新鮮爽脆並非黃菜之輩。


見餐牌腸類中相片最大的就是這款香草豬肉腸,感覺是撚手中的撚手,就要了試試。

灰白色肉腸上桌又粗又大又長,底部鋪有餐牌說的「招牌薯餅」,份量頗大。先叉少量薯餅試試,薯餅應有的鬆脆一點都沒有,反倒有陣陣阿拉伯味道,為證實,將薯餅叉起吊高,油份嘩啦嘩啦的向下湧到達滴油階段,足證薯仔產自油國阿拉伯,無可抵賴;大肉腸不是脆皮類,沒了「卟」一聲的破瓜快感,差了一點點,托賴新鮮煎起,總算可以熱辣入口。

完事後整塊鐵板汪洋一片,究竟做咩要落咁多油?相比起此品元祖魚一丁,質數相差十萬八千里。


經過失望的撚手大肉腸,倆口子對主菜已經沒大寄望,但否極泰來,白汁海鮮扁麵又沒想像的差。海鮮分別有蝦、帶子、墨魚及魚塊,全數新鮮感覺良好,當中尤以大蝦最為驚喜,爽脆彈牙Size 適中,又一次證明沒期望,前路更有希望道理;扁麵煮得不過淋總算Al Dente,屬廚子一大功績。

食到尾望望碟底,煉油廠一樣油光滿碟,促請眾煉油國繼續減產。

人係飽,但總需要甜品的滋潤,想不到最後的這一味,在平靜的湖面又泛起了點點漣漪。

由於友達不愛杏仁,所以這味楊枝甘露杏仁豆腐得以獨享。金黃色楊枝甘露內含切成條狀的杏仁豆腐,兩者味道各走極端但卻沒任何抵觸,加上芒果絲下得夠多又夠凍,食完前述一大堆油到飛起的油膩野,呻一口確有清爽去油膩作用,惟越吃越甜,下糖重手之故,假若可以減甜的話,效果就會更好了。

食飽飽傾下講下無無謂謂又一晚,時間過得真快。

沒想過會寫Blog 所以沒記下價錢,大概二百餘左右,都不算太貴。

總括計環境良好,坐低啤啤佢的話當然樂於奉陪,但用餐的話,我想不會再有下次了。

名稱:Table 18 Bar & Restaurant
地址:觀塘觀塘道418號創紀之城5期大堂上層UC-1號

15 comments:

Anonymous said...

有冇後悔冇等水蛇春咁長既邊爐隊 ?

"沒了「卟」一聲的破瓜快感"
--oh, 你追求呢d快感呀 ? 呢d年代好難揾架喇, 大部份人十幾歲都已經....(哎, 講左去邊呢..)

袁健健 said...

排條邊爐隊的話恐怕今時今日都未番到黎喎~

實不相瞞,我自細就好憧憬破瓜一剎既感覺,始終我呢輩睇東洋野長大,睇漫畫每每睇到男主角0係海灘矇眼扑西瓜扑到「啪啪」聲,情緒都會特別高漲、特別興奮~

Anonymous said...

>始終我呢輩睇東洋野長大...
DD睇人嘅姐,又唔你學下茶道,花道,淨係成日掛條X道。

袁健健 said...

難渡兄你唔好老屈喎,
我睇野不嬲都宏觀去睇,
我先唔會剩係掛住條●道咁膚淺~


成堆馬賽克,有咩好睇?

Anonymous said...

馬賽克?唔係呀化!雖則XVN摺咗,"網網"大海仲有好多步兵片噃!

袁健健 said...

我果輩果段日子,買東洋片要拋頭露面上好景尋寶架,何況步兵片價值不菲,尋常學生哥要籌期先afford得起。

家下網海係大把,但有時d 野,唔知好過知,唔睇好過睇,遮遮掩掩維持良好美滿印象。

Anonymous said...

>拋頭露面...
大家都係曾經走過呢條不歸路㗎嘞!好景殺氣重,我多數喺信和及後期嘅星際,至小撞到人,可以扮買CD買書。
當年阿蘇煮果D四仔倭人,十件有九件都係豬扒,三仔先至係王道;兩條紅衫魚只換得三隻咋!

袁健健 said...

初代信和好似未有艇家供貨,何況江湖傳聞信和十隻有三隻睇唔到,另外六隻唔跟封面,我d精華血汗錢唔可以白白浪費~

我後尾都撟遷星際,三樓一上直行到尾果間最有私隱條古惑仔又好傾~買生不如買熟~但要尋另類的,都係好景~@@

四仔d日本菜確係wear得很,我記得我第一次入手要舊幾水一隻,重被昆話買金碟貴d睇耐d..

睇耐d有x用咩,,翻啅豉油碟等同食人冷飯菜汁,好可憐。

Anonymous said...

>舊幾水一隻
LD年代(DD應該叫懷舊,復古抑或叫老x土),四仔50大洋租一晚,仲不可extend;東洋制作的,全港得兩款,一隻仲要係古裝(Help!),叫Shogun,另一隻唔記得。

果度最風光年代係長時間$100賣緊5隻3仔,跟住有人惡性競爭,攪到一舊6/7隻,甚至學埋超市,你對面減我又減,直跌至海嘯價10隻,之後就晚晚紮馬(好京啊!)。

然後種種陋習隨即湧現,一如老兄所說,唔跟封面,吉碟,夾雜套兒童適宜一級倉底片。如果有大學研究生肯寫thesis真係可寫成本 The Rise and Demise of the Hong Kong CD Empire.

Anonymous said...

btw, 阿蘇小小直畢甩畀架van鏟過,個鏡頭好似拍緊鬼古。

袁健健 said...

嘩...去到LD年代小弟真係甘拜下風,LD都有四仔?重可以租?係點既一回事呢?

最風光真係$25/PER 100/4 時代,去到六同七基本上己經收皮,到十隻更加係有DL 既年代,據聞最後重做到屈客,比五舊佢佢質多十幾隻比你唔找錢,堅持拡錢就兇人...最慘十隻有八隻係吉碟,做臭哂個朵...

唔跟封面係最陳年亦最WORK 技倆,我個人尚可接受,最頂係吉碟,千里沼沼準備好架生睇好戲,彈出NO DATA,當中掃興可想而知...

Anonymous said...

租LD是六四事件前後嘅事,日本3仔$10兩日一夜,港鏟片$15-$20(CMIIAW),仲好似宜家美容纖體,一定要買一巨疊套票。歐美4仔最多就係vivid, private & evil等應該仲未出世。

袁健健 said...

難怪,我諗想當年都係咸書年代,曉郁大概都未算最流行嘛?

Anonymous said...

你地两條友仔........唉, 真係破壞哂萬千女粉絲對你地既幻想呀!

袁健健 said...

祁,萬惡皆由小姐你起,唔好A 膊喎~

何況,呢樹邊度重有FANS可言。