寫十六項關於自己的無聊事。

「規則：當你比人tag左，就要寫一篇note，內含16項有關你的事情，習慣，喜好，目標...或任何各不相干但有關你的東西。最後tag另外16個人。你必須tag返tag左你的那個人。如果我tag左你，即係我想認識你更深。」

Facebook 被Tag 了十次八次都當無件事，當然唔係話忙到打幾隻字都嫌費事，而係，自從出現Plurk 後，已經有好大一段時間沒開Facebook 了，既然無玩，又無謂浪費心力在Facebook 之上，要玩，就留番Blogger 吧，求求其其的打幾隻字又一篇，慳水慳力。

自已一向討厭寫「關於自己」之類的東西，總覺得出來感覺要麼很扮不羈有愁善感，要麼有濃烈寫遺書Feel，結果兩者皆很做作嘔心，所以過往Blog 寫過關於性格的東西，都有很多假野混雜其中，認識我的，自然就會明白了。

開始寫十六項，一邊想，一邊避免著上述錯誤。

1●一諗起Tag 就記起ICQ 了，想當年玩ICQ 為搏目標人物注意每Tag 必搞盡心思去玩，諗起都無聊。

2○雖然無聊，但，又Work 架喎，試過Tag 得幾次，就會收到女型人覆「你個人都幾得意架喎。」咁，現在回想起來仍然很懷愐往昔網上女孩子好易呃的世代。

3●話就話易呃，但傾得幾句鐘一問拎電話就多多藉口，到最後迫到埋牆角重使出人間蒸法絕學，咩葫蘆賣咩藥大家心知肚明，網上人妖呢回事，絕對深得我憎。

4○雖則如此，但其實我都有做過網上人妖的，而且都玩得好盡好踩線的。

5●以前的ICQ Frd 都消失得九九十十，剩低的兩三位，已經唔會稱之為網友，而係好朋友了。

6○我曾經重開ICQ 打算重拾舊歡，但人去樓空鬼影無隻，我在想，ICQ 可能已經收皮了。

7●ICQ Account 為17347375，很難想像事隔六七年仍然能夠將之記得清清楚楚。

8○提起數字記憶，還有一組號碼是很自然記得到的，就是十年前澳洲女友的電話號碼，每當撥打IDD 0060+612，記憶就很自然的對上對方號碼，即使八年沒用過，依然運作正常，很吹漲。

9●移藉到MSN 後，已經沒了往時沉迷網上溝女的行徑，MSN 正式成為朋友間約出街工具，所以近年少開MSN，開左都隱形居多，唔想打太多字。

10○隱形關係，加上又不愛電話聯絡又有看動畫習慣，很容易予人與世隔絕又或宅／毒男感覺，但我要澄清，我雖愛看動畫，但家中係絕對沒有一比一的動畫人物造型被鋪床單攬枕套的，因為，好貴架原來。

11●當然連動畫人物胸脯型滑鼠塾都無啦。

12○同過我通電話的都知道，當通話到達某一個長度時，就會出現「又係既，好啦，咁唔阻你啦／咁到時再傾啦／咁下次再打黎啦」，一般大約為十分鐘左右，若然對方聽而不聞的話，會表現出若干心不在焉感覺。

13●講起電話，就一定要提殘存的ICQ 好友之一L小姐，相識差不多十載竟然一次傾多過五分鐘的電話紀錄都沒有，L小姐真的太善解人意了，所以她的那份生日禮物是絕對抵送的，不過已經逾期三個月了。

14○翻查紀錄，原來除了女朋友，我係沒有送出生日禮物的紀錄的，相負相乘，收的都很少很少近乎零。

15●沒嘗過牛肉沒慾望嘗牛；沒嘗過旅行樂趣沒興去旅行；所以沒收過友人的生日禮物，都沒啥難受感覺，反倒送得一年下年無送的話，倒退失落感會更加大。

16○當沉迷一樣東西的話，我會追根問柢很耗心力，就拿動畫為例，家下我睇動畫係睇埋導演姓甚名誰先去決定是否DL 的，而最病態係，連聲優都留意埋囉頂，所以當一樣東西沉迷到一個程度，我就會很自覺的抽離放開一下。

16+1●凡事有例外，AV 係命中注定戒唔甩，唉。

寫落其實幾過癮的，不過只得16項實在太少，再Tag 到的話再寫多幾款無聊事幹。

不過我在想，「如果我tag左你，即係我想認識你更深。」認識深了在這回兒事上，係咪錯左呢？