Thursday 12 August 2010

陽光檸檬茶。


維他檸檬茶廣告宣傳句「澀得起」相當莫名其妙,好地地一盒老牌檸茶九千幾萬樣突出點可以對外宣示,幹嘛係要強調味道酸甜中帶澀這個乍聽唔多似好事的賣點?聽著歐陽靖在廣告內不停「澀得起」依舊百思不得其解,直到近日喝著老媽因樓下百佳清貨而入手的陽光檸檬茶,箇中謎底終於解開。

「澀得起」壓根兒就是衝著陽光而來。

個人對陽光細檸一點都不陌生,甚至整個中學時代還一直奉行著「飲奶要飲維他奶,細檸要揀陽光牌」守則,但人大了沒了小食部貪乏選擇的枷鎖,每每走入七仔,茶好水好芬達好,就是沒想過揀盒檸茶去重溫舊夢,所以當瞥見陽光細檸盒面寫著「新口味茶檸絕配更啱你」的時候,都真係有點好奇心一探其虛實。

容我在這裏向大家宣佈,新口味陽光檸檬茶真的好很難飲,其難飲程度,就連我這個差點連尿都可以照喝不誤的人,亦要啜了兩啖就停口扯旗投降,閣下試想想,就連啜啜下都可以令我叫停扯著旗投降喎,可想而知這盒所謂「茶檸絕配更啱你」的新口味細檸是多麼的不濟、表現是多麼的不堪。

檸茶入口糖水一樣死甜得無話可說,感覺酷似開封後攤了十年的缺汽可樂,變壞了一樣暮氣沉沉全然沒有生氣可言,可謂完全失去檸檬茶應有風味,不特止,檸茶過甜甫入喉頭咳上心頭,棄去老味換上新味,味道卻錯得離哂大譜,若然當初品質監控人員的味蕾不是淤塞壞死萎縮掉,實在難以解釋好端端一盒陽光細檸為啥可以改成如斯惡口味。

喝不下去,還是沖杯普洱算數,邊喝邊想出錯點,才猛然悟出陽光檸檬茶就是少了酸澀味去中和死甜味。你說維他的產品開發人員和宣傳部沒針對敵對產品缺點作宣傳口號打死我也不會信,總之,過去沒察覺到的,現在卻令我深信不移,檸檬茶還是要澀澀地酸酸地才算得上正經事,所以維他檸檬茶澀得起就嬴了,相反陽光檸檬茶澀不起,就令我連碰也不想再碰了。

6 comments:

chaumet said...

話說本人係無甜不歡, 飲檸檬茶係細藝, 甜到上腦就係我對檸檬茶既準則, 雖然偶爾都會揀陽光飲下, 但係又點同維他鬥, 係最近酷愛陽光妹先至試下陽光, 可能佢set到咁甜係俾女仔飲,「當初相遇時回頭在笑 望著笑臉感覺像似首詩 」, 我諗就係佢想主打既感覺掛?!

walkinginpark said...

我反而覺得新好飲過舊..維他太酸,以前既陽光太甜....上星期真係好抵,全部陽光(除左荳奶,$8.8 六包。

袁健健 said...

chaumet:
死,我一聽陽光就諗起「如陽光 妳將痴心亮起」...
唉~我同你唔係爭好遠唧我諗,
但又一次在細微處暗見代溝呀。

walkinginpark:
各有各口味嘛~

但你以為$8.8六包就係平?
我樓下一樣係$8.8六包,但送多支汽水呀!!
圍起$4有六包,痴筋~

PP said...

啜啜下都可以令我叫停扯著旗投降

哈哈

咁支旗點算?啜咩好

walkinginpark said...

本來我果間都有汽水送GA,送完即止咋,咪又係百佳!

袁健健 said...

PP:
好開心,
這種笑點有一個人留意到重要識笑已經算得上成功了。