Thursday, 13 May 2010

臭同事。

正所謂勇氣是要來便來,所以客套說話就無謂多講了,還是開門見山跟大家說清楚吧。

據本人將近十年工作經驗所得,每間公司查實都總有一兩位零零舍舍特別臭的同事存在著,分別只在於好彩的只會聽過其傳聞而沒碰面機會,運滯的則被安排在同一部門每天臭來臭往,慘絕人寰。

咪先咪先,請注意這裏所謂的臭並不是中小學生睇人外表唔順眼就胡亂老屈人家身懷異味那種帶有歧視色彩的臭,而係一種入心入肺有形有味的臭,只要閣下身處其中,就能確確切切感受到一股來自他的臭味傳入你的鼻,順勢通過氣管直達中樞神經心肝脾肺腎,器官經半秒異味醃製後,任督二脈頓時打開,受害者輕則頭暈生臖噁心冒汗,重則反感怒放繼而嘔吐身亡。

很誇張,但絕對千真萬確,事關本公司就有一個頂級臭人不時在我領空範圍內團團轉轉走來走去,因其步速而揚起的臭風,總會直捲本部門上上下下窿窿罅罅每一角落,臭到盡處,差點沒令我在公司中心呼喚一句去你媽的大頭鬼。

體臭之事人皆有之,照計係唔多應該搬出人家私事出來在這裏大嗚大放的,但各位街坊實在有所不知,因繁忙而導致體臭沒法即是洗淨,屬不能也,可以原諒;放工返到屋企有涼唔沖有衫又唔走去換,永世著住同一件同一種味同一樣難頂的發霉發臭恤衫上班,則屬不為也非不能也,這種嚴重顛覆公司內部氣氛的行徑,換作身處唐朝的話,很可能已經被淩遲處死兼鞭屍數十回了。

嘩老友,你睇佢一身工作打扮!身穿淡啡色恤衫在公司招搖過巿反覆循遊狀甚醒目喎,咦?細心一看還要是皺布質料之仕樣,康當潮天烈百科全書的說!但有件事我想同大家講講,恤衫從G2000 東莞廠房出廠時其實係淺藍色筆直款來的,只不過它經過年月洗禮卻長期缺乏清水洗淨底下,就幻化成跟前這條梅菜模樣了。

若然電腦前有學藝未精的醫科學生不清楚人體汗線分佈,請細心觀察一下這顆人間核武,其所穿恤衫腋下位、左邊胸袋位、兩側後腰位和前方肚臍位皆泛著一伏伏深黃色起鏡神秘污漬,如斯位置出現如斯絕境,嗚乎哀哉!誰人敢挨近一索一啜我即席推舉你為王!

真的很臭,但我們又能怎樣?只好每逢見臭人出現皆閉氣入定,祈求事主盡早離開那就風調雨順國泰民安普世歡騰了。

所以話,何止愛?原來就連臭都係無路可退的。

10 comments:

Chaumet said...

你真係好好笑呀...雖然我知呢d野第一次可以當笑料之後就覺得係慘劇, 但我都想講依家d男人唔知乜事..尤其是肥仔(我唔係歧視肥人)都會響依家呢種天氣好很臭.我真係好想隨身帶支colone送過佢地...
又其實呢d臭風經驗我只係響考試時試過, 事關有d阿sir超臭, 每次行過那條冷巷時都會臭到我腦停止運作..份卷真係唔係難到嘔..係阿sir你臭到嘔..不過健兄你就慘d..都唔知要對呢兜友幾耐...直接同佢講會唔會好過d?!

Anonymous said...

絕對感同身受, 我之前間公司, 人已經唔多, 竟然有兩個臭人, 一人唔沖涼唔刷牙唔洗頭, 一個星期著同一套衫, 佢一行近我都會自動彈開, 另一係狐狸人, 未見其人先聞其臭...

李小龍私生女

Anonymous said...

可不可以向HR反映,讓他們和他/她討論一下?

潤滑KY said...

Chaumet:
「但我都想講依家d男人唔知乜事..尤其是肥仔」

-嗚...你一定係話緊我!!
其實佢唔係坐我附近,不過係平日會有交流而已,某程度上呢條臭人係幾有趣味的。
點講出口呀?「阿x,你知唔知你好臭呀? 」咁?講不出聲開不了口呀。

小龍女:
我以前公司都有,有時好難明白點解公司當初會請佢的。

無名氏:
據報上頭有人話過佢,改左個幾月故態復萌,何況,明言並不符合公司文化。

walkinginpark said...

借問果位朋友係咩職位?我公司都好似有一兩個咁既人...件衫都黃黃地...好彩唔係同我同department.

三隻耳朵 said...

原來有5個留言,但顯示就是3個啊!真的很奇怪,我那邊沒這問題呢!

聶秀康 said...

好奇怪啊!留了言又沒顯示,而數目真的又與留言數目不符,很奇怪呢!我這邊沒這種問題。

或者你重新login blogspot reset留言方法一次吧!

潤滑KY said...

三耳:
不行呢,
算了,由他嗎,反正都不太想寫了~

工友 said...

公司都有個IT部同事久唔久來整電腦 (噢!他也是肥仔)。無論夏天如何熱冬天如何冷,他都懷著一股汗臭噏味。莫講話同佢講啦,我連問身邊其他人「喂你覺唔覺呀」都唔敢。佢哋都若無其事,好似得我一個有咗幾個月咁:(

蚊企 said...

有同感.. 坐我隔離o個位 (唉, 都係肥仔), 最鍾意去後樓梯煲煙, 煲完成個人好似十年冇倒過既煙灰缸咁臭, 佢最好唔好開口講野添呀...
佢食lunch 成日都食到好飽, 一點半食完一路 "urgh" 到四點, 佢o個日食咖哩就係咖哩味, o個日食梅菜肉餅就係梅菜肉餅味...
我做蚊型公司, 冇位比我調架唉...

我有放你個blog o係我的最愛架