Iris W x KY氏食餐飯都要聯名企劃：大助。

企劃合作夥伴溫氏回港避世，身為東道主，加上住得近，我又很無聊，大家亦相當具卓見，當然要相約出來打個照面順便交流一下相互對環球經濟發展趨勢及歐洲央行對亞太金融體系影響的意見。

咪先，雖然我在微博裏猶如冤鬼一樣不停地有意無意提及，但請容我陰魂不散的在這裏再重提一次：條友係返左香港成個月都唔聯絡下我囉！唉，心淡喇心淡喇，永遠學不識心淡都用了半個月時間慢慢的心淡喇。

先睇戲，後晚飯，雙重娛樂加倍歡樂，更何況現在還要有加國美少女伴在身旁？再心淡都變得濃情化不開了。

是晚用膳地點選址九龍城新開張沒幾個月的日式烤肉店大助，日式裝修環境不錯，還沒領酒牌可自攜酒水，慳了不少。

二人同行，對家對點菜事宜長期處於是但狀態，人家唔諗我又懶得研究，簡簡單單來一記海鮮肉類二人餐免卻煩惱。


二人餐含一隻帶子、兩隻花竹蝦、一撮墨魚、三段長腳蟹、六件和牛、四片和牛舌和一堆雞肉，跟餐還包括兩客清湯、一小兜蔬菜和兩件飯團，陣容算不上鼎盛亦可堪豐富。

據經驗所得，本部呈武俠小說風的食評向來沒甚麼人有興趣收看之餘，行文還頗為趕客，加上近排很懶心情一般，就無謂多多口水逐圖擊破了，總之整體海鮮及肉類質素皆中上，當中尤以牛肉和牛舌為佳，三百餘近四百元一客二人餐，我不想說抵吃，但認為值回票價，仗著鄰近幾區又沒同級烤肉店，實有莫大翻兜潛力。


提起牛舌，發生了一段小故事。

話說牛舌入口香軟富肉汁甚為討好，但當時急著落單沒看清菜牌關係，其實我還弄不清所嚼為何物。

「妳知唔知呢舊咩黎？」我微微向牛肉旁兩塊淺粉色物體指指，對著溫氏說。

「應該係脷類物體啦。」我不想用「舌」或「利」，但「脷」又屬俗字不是每部電腦都能夠顯示出來，唯有在這裏冗長補原一番。

「係喎，個餐係有牛舌的。」我正在享受與牛舌的車輪軟綿質感。

「咩呀，牛舌？」牛用脷就低了、豬跟舌就怪了，所以牛舌豬脷的配搭是坊間一個不成文君子協定。「豬脷黎架。」

「豬脷？妳估我地果個係拜神祭品二人套餐呀？食緊烤肉喎，正路應該係牛舌囉。」

「但我覺得似豬脷喎。」溫氏堅持著。

「個餐成四舊水佢比四塊爛鬼豬脷我我會反面囉，我覺得一定係牛舌。」

「一定係豬脷！」溫氏狀甚自信。

懶得理跟前這條無知少女，向後揚揚手，侍應適時現身。

「唔該，我想問呢兩舊係咩黎架？」我指向那兩塊淺粉紅物體。

「係牛舌來的。」

「......」

一比零。


跟餐小兜蔬菜陣勢單薄，卻觸發了某事件。

「你食唔食山藥架？幫你燒埋啦。」溫氏夾著兩枚白色物體。

「梗食。」我仔細觀察著。「但咪先，山藥？」

「呢兩塊山藥黎嘛。」溫氏理所當然的說。

「跟餐蔬菜喎，無理由會用山藥咁有誠意既。」我用夾子鉗了數下，白色物體質地頗為實淨。「據本人在香港多年飲食經驗推斷，此乃雞脾菇。」

「雞脾菇？山藥黎架！」

其時，較早前落爐的一件已告熟透。

「妳咁堅持，食啦，食完妳就知錯。」

溫氏夾著白色物體緩緩放入口。

「點呢？」看著其入口後死狗般的模樣，結果顯而易見。

「......」

二比零。


帶子被分割成數片並拌著牛油連殼上場，二人夾下飲下分著吃感覺良好，唯是晚誤信侍者所言將帶子烤得過老，下次再嚐烤一分鐘相信就可起錨食得。


烤長腳蟹相當鮮甜很不錯，但花竹蝦亦手掌咁長、蝦頭多膏且肉質爽脆，兩者皆新鮮好吃，打個和。

順帶一提，此店烤爐火力相當猛烈，能有效鎖著食物肉汁，但切記勿一下子下得太多食物，否則一不留神應接不暇，食物燒焦了，那就浪費了。

兩枝自攜獅威不計數，埋單連加一合四百餘元，坐得舒舒服服食物質素不欺場，值得日後再幫襯。

名稱：大助
地址：九龍城候王道35-37號地下B鋪

夜已深，人已累，有美相伴影成對。
到皇室吃甜後，單人匹馬護送溫氏回家。

長路漫漫路遙遙，圓月底下影婆娑；
人去樓空何時了？鳥倦知還多淒楚。

首回合由本人先拔頭籌領先二比零，到下回合溫氏又能否扳回一城？嘿嘿，這真是一場夢幻般的邂逅啊。