Sunday, 13 June 2010

假日童話劇場.第一回。

為生活為旅遊,袁先生曾經有一段日子在油麻地果欄客串著搬運工人一職,每日清晨三點至八點不停的抬抬托托搬來搬去,可謂不知人間為何世。

直至某晚,在欄場發生了一件怪事為袁先生平淡的工作增添了一絲樂趣。

「喂,傻仔!」正當袁先生將一箱箱山竹搬到店鋪對面空地等待著買家貨車前來運走的時候,身後傳來了聲音,他回頭一望,甚麼東西都看不到,取而代之就只有一個在搬運期間不小心掉在地上的山竹。

「哼!叫你咁多聲先聽到,醒少少當幫忙好冇?」繼續搜索著聲音發源地,最後注意力落戶在山竹身上。「我比你整跌左呀。」

「...呀?」袁先生望著發聲山竹頓了頓、呆了呆,似有若無的想了想,就繼續刻苦的搬運工作。

「哈哈!做咩呀?係咪比我嚇親呢?」山竹黑色一舊沒有表情實在難以判斷,但單憑其聲調口氣,山竹當時心理狀況只可以用狀甚囂張來形容。「你地人類就係咁架喇,成日以為只有自己識進步,查實世間萬物都一樣,我地山竹都曉進化的。」

「進化到識講野?」忽爾覺得事情很有趣,稍稍停下手上工作,對著山竹閒聊著。

「我地家族世世代代都聽到你地人類語言,學得識又有幾出奇?」雖然看不到,但可以想像當時山竹係手舞足蹈地說的。

「下?但你地有聲帶架咩?」袁先生滿臉疑惑地問。

「劣根性!又係人類的劣根性!你地連自己身體構造和功用都未完全了解,何況我地?唔知就唔好以為人地無!」好像有點道理。「不過講時講,雖然你地係蠢,但亦相當感謝你地幫我族不停繁殖和不斷協助進化改良,令我地變得更強壯巨大、身體更健康。」

袁先生望著山竹,心有戚戚然。

「到我地長大成年,你地又送我地去世界各地旅行增見聞,我族群的長輩個個一出門之後就無再回鄉了,可想而知,一定係樂而忘返啦!我等左咁耐,今次終於輪到我出國了!哈哈。」

「講完喇可?」

「係呀,好有道理呢?」

袁先生甚麼也沒有說,只默默的將發聲山竹放回其中一個紙箱之中。過了沒多久,買家的貨車來到,工人們將一箱又一箱山竹拋上貨車上,並運往新蒲崗大成街街巿等候店主沽售發落。

山竹們會遭逢怎樣的命運?袁先生不想知道,他只想知道含智慧的發聲山竹汁液會否比尋常的來得更甜更美味。

4 comments:

chaumet said...

嘩..我又笑到死左, 袁兄會唔會覺得過多幾年, 有讀者會以為你有妄想症, 哈哈, 你寫d野好抵死又好wow, 搵人幫你出本散文集啦!!!

潤滑KY said...

本文其實係N年前舊作的2010修訂版。

過多幾年?
我邊有可能寫到咁耐,
寫得埋今年都算好彩了~

飽唔飽 said...

like this story!

袁健健 said...

飽唔飽:
感謝感謝~~