Sunday 20 June 2010

假日童話劇場.第二回。

果欄工作時間日夜顛倒關係,袁先生作息向來唔多定時,正當整個屋苑大部份住客皆安在家中休養睡覺的時候,他喜歡到樓下公園來回踱步思天想地記空虛。

是晚袁先生換上便裝穿好波鞋,一如以往沿著公園小樹林,緩緩散步到公園中央近魚池位置,正當來到魚池旁準備伸大懶腰吸收日月精華之際,忽爾聽到一段少女扮CutecCute 的歌聲。

「♪喵~喵~我要食魚~♪」袁先生探頭一望,發現對面池邊趴著一頭貓咪,悄然走近,才驚見貓咪正對著池中呈靜止狀態的錦鯉唸唸有詞流哂口水。

「唔...」無啦啦對著野貓說話的行徑相當低智,但袁先生確實做了。「你頭先唔係出聲嘛?」

貓咪身子先是怔了一怔,繼而慢慢回過頭來望向袁先生。

「呀...喵~」

「......」「呀」聲一出,再「喵」已經毫無意義。「你扮唔識講人話都扮得專業少少啦唔該。」

「...」事到如今,骨已露,貓咪亦覺無謂再扮。「點解你好似唔多覺得驚訝咁既喵?」

「呢個年頭,咩野都曉進化架啦。」健健一臉若無其事的說。「連無口的山竹都識講野,試問有眼耳口鼻的野貓曉講野又有幾出奇?」

「山竹喵?」貓咪呆了呆。

「係呀,先前見過一枚曉講野的囂張山竹。」

「喵喵~」貓咪點了點頭。「不過你可唔可以唔好同其他人講呀?如果有人知道我識講野,我怕會被追捕喵。」

「有咩好講?山竹識講野我都無同人講,野貓識講野有咩好講?」

「...咁你就當無見過我啦喵。」

正當貓咪轉身準備離開案發現場,忽爾四腿一軟,整個身子軟倒在地上。

「嘩喂,無野呀你?」

「喵...我幾日無啖好食,行唔郁喇...」貓咪攤在地上望著袁先生有氣無力的說。

「真係煩,點解我成日會遇到呢類古怪事?」袁先生細心打量著,才驚覺貓咪身子瘦弱得猶如皮包骨一樣。「咁啦,我反正一個人,你黎我度住下先,等養返好身子先走啦。」

「喵...我唔鐘意受人恩惠架!」貓咪說畢,肚中傳來轟隆巨響。

「行啦,俏皮扮野貓!」袁先生一手提著貓咪,往著住處進發。

貓咪被袁先生擁在懷裏,身子貼著其緊緻胸膛令貓咪感到前所未有的安全感,牠在想,這或許會是一頭好住家吧?

「喵~係呢,頭先你話果枚囂張的山竹係咪都比你帶左返屋企呀?」

「無喎。」袁先生木無表情地說。

「識講野喎,你咁都唔帶返屋企喵?」貓咪一臉疑惑望著袁先生。

「識講野咪又係山竹一枚,有幾奇?」袁先生依舊木著臉。

「咁佢最後去左邊呀?」

「食左啦。」

「喵?」

「我話食左呀。」

「......」

若然有氣有力的話,貓咪老早使出鯉魚翻身掙脫袁先生,繼而散水走人逃之夭夭了。

5 comments:

K said...

翻炒舊作既同時係咪準備緊逾時處罰唧?
等你好久啦!

袁健健 said...

...........
你係邊個!?
呢個世界知道我呢篇係翻抄既人應該唔超過五個!

Irisssy said...

See!!! 有好多人幾得你篇逾時處罰架囉!!! XDD


.....緊緻胸膛........唔...........

K said...

我只係催你出逾時處罰既讀者一枚唧。

同埋,翻炒一事係你自己講個囉唔該。

潤滑KY said...
本文其實係N年前舊作的2010修訂版。

過多幾年?
我邊有可能寫到咁耐,
寫得埋今年都算好彩了~

13 JUNE 2010 21:08

chaumet said...

我覺得隻貓遲d會變做一個美女....
都係不雅劇場好睇d wor~