不雅劇場．第三回（炎熱敷衍版）。

袁先生懶愛國的對外宣稱身為中國人不應以外語來編寫部落格，狀甚血濃於水，但事實係，他只想藉此來掩飾自身英文差勁不堪窩囊廢罷了。不過英文拙劣歸拙劣，唔講唔知，原來袁先生數年前曾放洋洛杉磯讀過兩三年番書，留學留到連英文盲字都唔曉多隻，情況可謂比他的微博更值得人去關注。

前幾日，袁先生相約很久不見的友人A 到咖啡店用膳喝啡兼吹水。

「Hey！How are you guy？」兩人甫見面，袁先生即扮洋化的跟對方相擁問候，繼而邀請對方就坐，事情本身沒甚麼問題，但此情此景出現在旺角巴黎咖啡店，就怪異了。

兩人N 年沒見沒甚麼話題好聊，過了沒多久，就算唔多關心也好，循例都要問問對方近況的。

「點呢？近排有咩搞作？」友人A 喝著啡問。

「無咩特別，係前排過左Macau 玩左兩日。」袁先生滿臉自信的說。

「下？哦，澳門。」友人A 貌似恍然大悟，但其實蘊含著暗串成份。「半中半英個台我真係調你唔到。」

「噢，唔好意思，你都知我L.A. 返黎，一時改唔到口。」說完，袁先生仰天哈哈大笑，很有西人風味。

「留學L.A. 的港人個個都係咁架？」

「係掛，起碼我認識的都係咯。」

去完L.A. 讀書的港人真係煩。友人A 暗忖。

「你一個人去澳門？無啦啦做咩去澳門？」友人A 調整了情緒後問。

「我果邊有Friend 嘛。」

「哈哈，難道係Macau Friend？」友人A 掩著嘴說。

「嗯。」

「嘻嘻，我睇你個樣都知有唔少Macau Friend 啦。」

「識咩人都有樣睇？」袁先生竟然真的認真起來。「識睇相架你？」

「係架係架，咁你識唔識人住Holland 丫？」友人A 帶著賤笑問。

「又識喎，以前L.A. 讀書識的。」袁先生想一想後答。

「咪係囉，我一睇就知你Holland Friend 多。」

「點可以睇到我多Holland Friend？」

「好難形容，總之你一身都散發著濃烈Holland Friend 的興味。」友人A 大笑了數聲後說。

「唔...相學真係神奇。」

兩個人的友誼，就是建基於這樣的薄弱地殼之上。