Thursday, 7 January 2010

巨無霸之戀。

多得麥當奴限時特價企劃,某晚放工找了個藉口放棄老媽住家飯,到圖書館走了個圈後,就獨個兒來到樓下麥記來一客我的最愛巨無霸餐大快朵頤。

我當然不是窮途末路到要等佢平兩三四雞才能夠解放吃巨無霸慾望,亦一向不太覺得麥記定價特別離譜,始終經歷過$16 一客連餐飲都沒有的透明餐蛋治,就會令人明白幸福其實一直默默守在身邊的大道理,不過年紀唔細無啦啦吃麥記做晚餐始終需要推動力,這個限時企劃,來得恰到好處。

搵好位,打開蓋,捧起飽滿可愛巨無霸吃將起來,正當心滿意足享受著雙層牛肉拌芝士洋葱夾酸瓜的紮實口感之際,不經以往前一看,發現鄰桌胖女子以上下分離模式蠶食巨無霸,放眼鄰近三兩枱獨身客,不論男女,亦以同樣架勢享用著巨無霸,看著眾人一式一樣的邪道食用方法,一道靈光忽爾由天靈蓋直劈到丹田位置,人就好像從睡夢中甦醒過來一樣:原來一些被自己視為大路的日常習慣,在無聲無色間已經被新流派取代軀散掉。

現世代還有人會以原個吞噬方式服用巨無霸嗎?有,但都成為了弱勢社群吧?自己就曾經就上述事件走訪麥記細心觀察巨迷的食用方法,發現除了個別胖壯人士及幼童以鬧著玩心態去挑戰巨包之外,真的沒有人會用這種男子漢方法去食用巨無霸。其實巨無霸天生出來就不預期被拆開放入肚,尤記得孩提時麥記宣傳巨無霸官方食法那個廣告,片中情侶撐大口盡情一咬的表情,秒秒鐘歡聚歡笑,何其溫韾豪邁!現在呢,就好像旺旺果粒多廣告一樣,連媽媽都變成小嘴巴了。

我深明邪道的吸引力,因為自己亦曾為叛徙一份子。巨無霸拆開後分成上下兩部份,由兩片麵包夾牛肉洋蔥酸瓜組成的上半只為聖戰前的開胃菜,真正令人著迷必屬由一塊麵包、牛肉、芝士及生菜組成的下半部,虔誠地將之小心對摺,手中物頓時被幻化成雙層材料摺包,入口肉味跟芝味得到雙份加乘,加上開胃酸汁,這難道不是仙人的食物嗎?

得啦,唔駛問阿貴都知漢堡王等等美式餐廳出品比其好得多,但漢記賣四草麥記才兩草,你話你比個甚麼勁?邊吃扒王之王邊抱怨味道不及Outback,嚴格來說應被視為心理病的一種。我有時會想,若然夠膽將兩個巨無霸疊起來吃的話,相信連裂口女都唔係話咁易就能夠將之吞掉的。

現代人真的都是小嘴巴,不然以前雄風凜凜的麥香雞,怎麼會演變成現在弱不禁風的雞片包?

或許這就是所謂的體察民情了。

4 comments:

Iris W. said...

其實我最好奇既反而係「到圖書館走了個圈」哩個舉動囉,太唔似你喇實在!XDDD

puiyee said...

我舉手!我依家食巨無霸仲係成個啪的!

潤滑KY said...

Iris:
我暗啞底想表現自己有文化呢件事都比你留意到,你真係了解我~

借定本書,上機渣住定驚~~

Puiyee:
很有男兒氣風範的說~

Sammi said...

我係女~我呢排食DOUBLE足3兩都係成個來, 我食巨無霸都會係成個來的, 分開食唔好食~