Monday, 27 August 2007

《導火線》。

對於我呢類盲亨來說,入戲院遇上唔對路爛片比率幾近五成,遇岩放工後身心疲累總可以邊睡邊醒捱過去,不幸碰上精神飽滿訓唔著日子,提早離場又實在太浪費太沒原則,九十分鐘時間總要打發,最佳苦中作樂方法莫過於尋找箇中腐爛位。

爛片雖爛,但每部總有一段極短的蜜月期,蜜月期賞味期限一到,換來就是腐爛的開始,而這個令人覺得「係呢度開始知道自己入錯場喇!」場口,就是腐爛位了,就拿詹端文的《戲王之王》為例,個人認為當電影去到許紹雄七情上面的模彷卧底被害經過就是一個腐爛位,導演藉著該段光影畫面向著在場觀眾宣佈「你地賴野喇」,貨物出門恕不退換,無奈但只可接受。

入場睇有點期望的《導火線》,甫開首只見丹爺在鏡頭前坐定定以專訪形式發表「警察有否拉錯人」的偉大言論,老土肉麻到極致,心即時被急凍一大截,我在想,這難道會是一個腐爛位?假若閣下屬於樂觀份子,當然會記起咸豐年前由陳嘉上執導的《野獸刑警》用上差不多手法而又精彩絕倫,但好事唔上心,壞事卻時時刻刻掂記著,一見《導》的專訪式開首,腦海即時浮出爛片代言人《大嬴家》,觀映期間被《大》片開首時歌神許冠傑扮貓王出完千領著數條鬼佬跳舞一幕不停纏擾著,有咩辦法唔一額汗?

托賴,一切還可以,但僅此而已,《導火線》始終都不及丹爺代表作《殺破狼》令人耳目一新,《導》片不論故事和手法都帶著點點過時味道。

頭段連番運用快鏡凝造時尚型格感覺,不反感,但配合的陣陣台劇系聲效才算可怕,看著看著,猛然醒起無記的《同事三分親》,認真罪過。要談到老土,最令我毛骨悚然的必選丹爺、古天樂和肥貓聚在沙灘聊天一段,不知是畫面色彩問題抑或是日特別挑剔,總覺得對白嚴如八十年代末一大堆英雄片,眼猶未盡,還要來一幕異常兀突的晨運客齊齊落水來表達出樂觀心態,看著眾長者四萬咁口笑騎騎慢動作跑落水,即時雞皮四起。

《導》片嘗試理順劇情變得更合理,可謂吃力不討好,個人認為此舉實屬無謂,就好像歌手要勁舞就例牌咪嘴一樣,看打片,早早有心理準備劇情胡混反駁位多,與其搞一大輪腦汁仍然落得盞搞收場,倒不如來多兩三場大打特打好過,今次《導》片為了鋪排故事浪費不少菲林,相對打位變得太少分得太後,看得不夠過癮。

原諒我太挑剔,就連最精采的打鬥場面都要抹黑一下才安樂。

動作當然是丹爺監守自導,自從《殺破狼》、《龍虎門》後,其功夫架勢已經成為我的最愛,尤其其招牌式黑皮褸加上手搖搖侍機架勢,有型有款到不得了,但是晚自己不知是否眼域突然開到另一境地,在《導》片末丹爺跟鄒兆龍一段高潮打戲竟然看出兩三幕穿崩,丹爺彈弓一樣拳未有耐到肉即時縮手,鄒兆龍又隨即叫痛彈開,造假情況活現眼前,大感愕然捽捽眼,接著一拳情況依舊,難以置信,好在及後再沒有異樣出現,變方一邊腳一邊踭的「咇咇啪啪」又踢又批又掟又撻,還是很過癮的。

《導》就跟《殺》一樣充斥綠葉,但搶鏡度一般,不知是否呂良偉廿幾年前穿著「霧Folk」波鞋跟獵豹鬥快跑山的廣告太深入我心,今次重出江湖,其一字一句一舉手一投足都予我陣陣濃烈娘味,我承認這點是我的戇居偏見;相反另一奸角鄒兆龍就較得我心,夠酷又有功夫底子,假若能夠聯合回吳京三個打得之人來一場,吸引力更勝一籌,其他方面,除了刻意經營的一句「件制服唔係比你著黎威架!」有點記憶外,其餘角色如肥貓、洪天明之類,表演平平沒啥深印象,唔用力回憶的話差點忘記有份客串。

《導火線》其實算不上差,但相對於前兩部丹爺出品《殺破狼》、《龍虎門》,不知是新鮮感問題抑或對手問題,大有平均地每況愈下之勢,我想甄子丹 + 葉偉信這對組合可能處得太久了,寄望下套作品可以換換班底來一點新衝擊,為丹系打片帶來一番新景象,否則的話,就快厭了。

5 comments:

難渡怖山car said...

你條友仔一日廿四小時裏任何時間都可以上傳!?

潤滑KY said...

你條友仔夠係四點幾都唔訓走黎睇,
我d野唔係真係悶到可以用黎治失眠呀?

難渡怖山car said...

半夜三更,遇上難渡之處,情商急借潤滑KY一用矣。

祁佳仕 said...

怪就只好怪丹爺呢幾年已變得過份自信....其實到後段佢同倪星(因為唔知佢新名中間個字點打,所以唯有用回舊名啦)打既情節拖得太長喇...我知我知,丹爺係想表演佢識各地武術丫嘛,但係電影始終係以戲情為主架..

潤滑KY said...

丹爺話呢d 叫做MMA 嘛,但老實講,我唔識貨始終喜歡拳拳到肉血肉橫飛多少少,野野擒住著手扭兩扭就當係,唔夠野蠻唔夠男子漢囉。

不過丹爺確實係囂係自信左好多,睇佢D專訪,係幾多狂言既~

哈哈,睇呢類片我向來睇得好開,劇情唔好太過份已經可以收貨~呢套...其實已經接近要退貨架喇。
其實要發揮,倒不如參考 TONY JAA 整套港式冬陰公,純粹見關過關,由頭打到尾就最痛快~