Monday, 3 September 2007

炎炎夏日,但我們卻感到清涼舒爽。

「喂,其實你地信唔信有降頭呢回事?」近日工作異常繁重,平日截至中午十二時可以消耗一份《蛇果報》、一堆《開飯喇》最新食評、香港討論區三大欄目潮流版、電影版及動漫版及兩個跟開的網誌,但近幾星期差不多要食完午飯才完成以上基本動作,工作之增幅可想而知,難得到Lunch 同事們齊腳開飯,就著量的聯誼一下。

「食緊飯,無啦啦做咩講降頭?」新來的男同事K 不太習慣我的無啦啦。「你唔係遇到怪事嘛?」

「無。」我搖著筷子。「尋晚有線電影台又做爛片《南洋十大邪降》,我又真係中左降咁坐定定睇足全場,所以好奇問下。」

「明爛你都睇。」同事K 一臉輕視眼神,分明懷疑我引以為恥的賞戲品味。

「係爛,但爛到一個極致地步就會變成Cult 片,《南》其實都Cult Cult 地。」 我自辯著。「不過真係幾爛。」

話題無法延續,大家默默的埋頭苦吃。

「講開降頭,我有個親戚真係比人落過降頭,所以我地全家都唔鐘意去泰國、印尼之類旅行。」女同事A 忽爾神色凝重的說。

「我一直以為你怕比人認錯係泰妹先唔去添。」同事A 比鄧穎芝還要黑多一個骨。「咁佢中左咩降?」

「好似係咩情人降定桃花降,有咩效果我講唔出,但到而家都好似重化解唔到。」同事A 吃著飯說。

「桃花降,聽個名都略知一二。」我推理著。「九成係遇到好多伴侶但都結唔到果,又或喜事總撞正白事,又或男/女朋友非死即傷之類。」

「係真喎,都類似喎!」同事A 從微波爐取出飯盒,施施然的埋位用餐。

「唔知點解一聽降頭D 名就好易估到個效能。」同事A 開飯無耐,我已經差不多搞掂洗盒。「桃花降、飛天降、失戀降、食飯降,總知名詞又或動詞加多個降字尾,個功用就呼之欲出...但個名係咪D 大師話你地知架?」

「係掛,總知屋企人係咁講。」

「等我一直以為做戲為方便觀眾適別先用呢類名,原來真實都一模一樣。」無咩人理我,很明顯無人有興趣探討降頭命名方面的問題。「咁你個親戚無啦啦做咩比人落降頭?」

「係上一代恩怨黎架,詳細我都唔知,何況屋企人都唔會多講。」同事A 吃著吃著。「始終又唔係咩馨香事,所以我一家人都好驚降頭,總覺得好易害人。」

「好人好者鬼得閒落你降咩?何況降頭都有好同壞架嘛。」我邊洗盒邊說。「我就知有一種降頭係可以幫到人重拾自信面對人生既。」

「......」無人理。

「咳,你地估下係咩降頭?」我沒趣的問。

「唉,有冇貼士呀?」同事A 用完餐,沖著奶茶,免為其難的敷衍著。

「唔...正如前述,降頭通常都係名詞或者動詞做頭,呢個兩樣都唔係,非常有風格。」

兩條友坐定定左諗右諗。

「信心降啦。」同事K 答。

「我話中你都噓啦大佬。」

「不瘦降!」同事A 忽發奇想。

「方向正確,但我個答案一定好得多。」

兩人又諗了一大輪。

「唔諗呀,好煩擾呀,開估啦!」同事K 跟A 都投降。

「哈哈哈哈~咁開估喇喎。」

「黎啦,諗唔到。」兩個人期盼著

「係...威而鋼呀,哈哈~」

兩個人專心執枱抹地,直至冷空氣消散為止。

5 comments:

尖尾 said...

「好似係咩情人降定桃花降,有咩效果我講唔出,但到而家都好似重化解唔到。」同事A 吃著飯說。

................

「係真喎,都類似喎!」同事A 從微波爐取出飯盒,施施然的埋位用餐。


佢 lunch 食兩盒飯?

潤滑KY said...

飯一盒,餸一盒,以免汁浸飯丫嘛~~~

潤滑KY said...
This comment has been removed by the author.
kit said...

好一個威而降, 爆笑

尖尾 said...

原來如此... 小弟無帶飯,不知有此講究也!