Tuesday, 21 September 2010

集中營沒有胖子。

我當然不會用自己來做指標那麼智障,始終久不久會出現暴飲暴食狀態嘛,點計都算不上是均衡飲食的,但我想講,我的暴食都不過是非常規行為,平日一至四皆常備份量細小住家飯回公司作午飯之用,入夜又多窩在家中用膳甚少外出怒吃,幹嘛還是會發胖?咪先咪先,我不是埋怨自己發福體胖,有些時候甚至還會為自己的肉厚體寬感到異樣的安全感,但,借問聲時下的年青少男是否都不吃飯的?要不怎麼會撞口撞面也是骨瘦如柴無處好肉身穿加細碼上衫和廿四呎腰牛仔褲在市面四處走動?

請大家不要再用「人家有做運動咪唔肥囉」來為他們開脫,本人雖然眼細視點較狹,還是分得出瘦子和鋼條男的差別的,單看他們樹枝般的雙臂提著戰利品時骨頭畢現青筋盡起,就洞察得出他們的肌肉指數不會比我脂肪含量高。咪先咪先,或許我需要強調多次,其實我並不是埋怨自己長得胖,我只不過是好奇時下的年青少男是否都踏上了成仙之路,再不用吃飯用餐尋求溫飽罷了。

身邊也有不少朋友擁有上述傳說中的排骨特質,每次詢問到相關問題總會得到「咪同正常人差不多食量囉」的惱人回應,呸!這壓根兒就跟高材生接受傳媒訪問時表示自己沒有特別用功讀書沒分別,假惺惺得令人反感怒放。我明我明,我明白他們或許真的認為自己所吃的是正常人食量吧,但我想講,半碗飯三塊肉兩條菜和一啖湯真的不是男子漢應該有的正常人食量囉。甚麼?還要堅持自己真的食量無異嗎?那我只好獻上三包花塔餅予閣下依時服用,祝願體內寄生蛔蟲早日離主他投。

咪先咪先,我真的不是因為人家得天獨厚食極唔肥而自己又食乜都死無計可施,繼而心生嫉妒惡言相向啦,只不過上星期在某服裝店遇到了一些事,忽然間有感而發而已,至於是甚麼事,篇幅所限,現在不贅,留待下回有興再續好了。

7 comments:

M said...

查實呢啲係咪基因突變?點解呢個generation嘅人日日食麥當當KFC都可以瘦到成條柴咁…

Anonymous said...

我係女仔
真係寧願啲男仔肥好過瘦
瘦真係好好好核突

識得有個男仔好瘦好瘦
佢身上完全無肉(連小腿都無),全部係骨同埋青筋
佢高我15cm,但竟然同我差唔多磅數
有次無聊之下問下佢點解會咁瘦
佢比我既答覆:新陳代謝太快…

小瓶子 said...

我中挺身材啦...好羡慕嗰D心口有多D 肉地既女仔.

Anonymous said...

好同意, 男仔瘦過女仔簡直人神共憤. 早日成仙把啦.

袁健健 said...

M:
健康生活嘛,
特區政府為控制巿民體重,
在新型卡介苗內都導入了蛔蟲成份了。

無名A:
我都認識好多瘦男,
識左十幾年身型完全無轉變過,
好難相信有人可以均衡飲食得如此長情。

小瓶子:
中挺咪好囉,心口多肉唔代表好的~

何況,你謙唧嗟~

無名氏B:
巿面上越來越多男瘦過女的情侶,
個人而言很難接受,
當然,我唔排除箇中包含妒忌心態。

瘋go said...

體質唔同, 咪咁囉, 可能佢哋好羨慕你呢。我like有肉地男。

chaumet said...

唉...我地d女仔..去h&m zara行一轉又咪係俾d「骨妹」搞到無地自容..而且骨瘦如柴的都屬富貴人家也...因為工人煮埋d營養不良既餸俾佢地食~