Thursday 9 September 2010

徒然。

在旺角新寶看完電影後,就跟友達移師到朗豪坊 H & M 血拼,有去過朗豪坊H 記的都知道,該店男裝部微小得好像從沒有存在過一樣,加上現場人多衫多猶如亂葬崗,再觀察入微也好,逛了沒十五分鐘就沒興再看,所以所謂的血拼,其實只適用於友達,而我,只能找個空位等候發落。

好不辛苦覓得空氣比較流通又不阻人的空間等將起來,其時早有一年長男霸佔了一角落,過了沒多久,身邊又多了一位少男就位,三條男人在漫天戰火中等候,等了又等,寂寞到夜深,真不知人間為何世。

「等得真係耐。」先打破沉默的是年長男。

「我等左差不多二十分鐘。」我望望錶說。

「算少啦,我早過你等,差不多半個鐘喇。」年長男歎嘆口大氣道。「都唔知搞咩搞咁耐。」

「咁左試右試,人又多,係咁上下。」我嘗試為她們開脫。「無野睇岩還好,有心水的話,一頭半個鐘閒閒地。」

「唔係嘛?」其時少男耐不住無聊,加入臨時即興吹水局。

「有幾奇?要怪就怪係旺角店,如果係中環店,有整層男裝部,容身之所相對較多,家下?」我指引著少男望向四周,現場車水馬龍。「失物認領處咁款,自尊心都下挫了。」


正當三條麻甩佬感懷身世,友達提著數枚衫裙急步來到面前比劃著。

「好唔好睇呀?」「唔好,隻色好怪。」

「呢件呢?」「個圖案唔得。」

「呢條連身裙呢?個剪裁幾好喎。」「太長,整到對腳好短。」

「問親你咩都唔好睇,咁咩都唔駛買啦!我自己睇好過。」後,就沒入人群之中。

只餘下我,無言。

「錯失良機啦,原先有機會走的,你又反抗,咁咪兵家大忌囉。」年長男語重深長地說。


沒多久,見中女執著一堆衣物走到年長男前套取口供。

「好唔好睇呀?」「OK 呀,會幾好睇。」

「呢件呢?」「都好呀,幾Fit 身。」

「呢條連身裙呢?個剪裁幾好喎。」「係喎,應該會著得幾瘦喎。」

「件件都好好難抉擇添,等我試埋其他色先。」後,就沒入人群之中。

只餘下年長男,無言。

「錯失良機啦,原先有機會走的,你又一味奉承,咁咪兵家大忌囉。」少男對年長男笑著說。


相距數分鐘,美少女抽著數件衣服來到少年面前。

「好唔好睇呀?」「你鐘意咪OK 囉。」

「呢件呢?」「你自己覺得點先?」

「呢條連身裙呢?個剪裁幾好喎。」「最緊要你自己覺得好睇。」

「問你都廢架!咩意見都無,我一陣自己揀完去比錢算數。」後,就沒入人群之中。

只餘下少年,無言。

「錯失良機啦,原先有機會走的,你又毫無意見,咁咪兵家大忌囉。」我對著少男說。


若有所思,事情好像有點不妥但又找不出個所以來,最後一干人等沒有再說甚麼,只靜待失物主人前來認領。

8 comments:

仕仔 said...

哈哈, 好好笑, 道盡一眾等女男的心聲.

我最唔鍾意去朗記果間, 我入去都係因為當佢係一個緩衝區, 天氣咁熱, 入去涼涼冷氣果隻. 好似遲D奧海都會開一間, 可以想像得到都會好似朗記那間一樣迫都迫唔入, D衫一地都係, 條龍水蛇春咁長.

Betty said...

哈哈...我系唔会同男仔睇女仔野..大麻烦.

Betty said...

同女仔去行街..种要人介绍女仔你识?

chaumet said...

你呢類文好正WOR..得閒寫多D呢D啦!!!

袁健健 said...

仕仔:
朗豪坊同又一城都唔掂,
最好行始終都係中環。

遲下鑽石山都有,希望有男裝部啦

小瓶子:
行街唧,又唔係行房~
無用啦。

chaumet:
呢類文係平易近人,
但亦最需要計算同用腦,
唔係成日嘔得出來的~

仕仔 said...

圓方那間都O 架, 男裝部少人又闊落.

Klaris said...

笑死我...

利是餅 said...

半夜三更睇,忍唔住笑左出聲.