Thursday 15 July 2010

兄之食桌。

據探子回報,新蒲崗近舊裁判處位置有一人龍中式小炒店,其受歡迎程度連城中巨富大劉和Paco 亦曾幫襯讚好,兩位大人物讚好對我來說其實沒啥法律效力可言,但既然食店鄰近老哥寓所,是晚又因事要登門造訪,相請不如偶遇,就二人同行投石問路到該店一探虛實。

實不相瞞,本文原先打算只安排在微博求求其其寫兩句就算數的,但翻看食照赫見質素奇佳,若然今回放棄大造文章,依我攝影造詣,恐妨要到十年後才再有另一潤靚相誕生,無計,又要到食評時間。


二人飯局以硬砌小食展開序幕,坊間大多以花生酸菜之類頹物作廖化,此店則換上冰涼青梅,平淡細微處見心思,有助增加印象分。青梅咬落爽脆清甜甚能醒胃,飯菜未到已清梅。

用花生就平凡了,用青梅就高貴了,兩者成本不會差太多,但予人感覺迥異,從細節處見優勝劣敗,此項不單適用於食肆,其實很多事都是這樣的。


見淮香蝦只售廿多元,狀甚便宜,要了一客作伴酒菜。

近收工關係,這客淮香蝦比網上看到的增量一半有多,蝦經油爆爆得香脆不油可頭軀帶殼往嘴裏吞,一啖一隻鬆脆香口屬伴酒佳品,煮法不同於白灼關係,蝦新鮮與否不算重要,蝦肉不霉不臭不會吃完又痾又嘔就算恰如其份完成霸業。

由開場啃到散場才廿多塊錢,很抵吃。


據報避風塘雙霸乃當店名物,一場來到,又叫一客搞搞佢。

雙霸者,鮮魷與白鱔片也,箇中混入蝦乾及腰果,單看出場陣容已知屬高劑量搶酒菜,以避風塘方法炒之,加入辣椒令此菜在濃重蒜香中暗帶微辣,啖落極度惹味但殊不油膩,廚子功夫可見一斑。

先嚼腰果一口酒,再吃鮮魷兩口酒;
來到鱔片三口酒,最後蝦乾清了酒。

一客配上幾支大啤,層層遞進的去吃去喝,搶酒程度更勝人間無數。


又唔係只喝不求飽,要飽肚總需要正規熱物扶持才成事,見銅盤雞為當店第二名物,我又愛吃雞,就試試。

雞碎上以銅盤盛載,內有蒜子、蔥段、紅棗等作配料同煮,用匙拌好後香氣四溢,要碗白飯伴吃錯不了。銅盤雞味道跟祖國吃到的一系列雞煲有異曲同工之妙,好吃,但談不上驚喜。個人吃雞信條始終情歸於白切與炸子一類原隻雞處理好後才斬件上桌做法,雲耳蒸又或炒制式碎上,如非特別出色,一般都很難得到我歡心。

銅盤雞份量不算少,味道亦不差,一大盆上桌三五知己圍著吃,勝在夠熱鬧,多人幫襯還是值得來一客、滋味來一客的。

跟老哥坐了兩句多鐘後結賬,茶芥加一連三支青島合二百多,價錢尚可,最重要食物不錯吃得出廚子有水準,見菜牌還有幾款小菜具吸引力,不久將來必定拖馬再訪。

名稱:迎月小菜館
地址:新蒲崗景福街91-95號地下

6 comments:

素顏天使 said...

終於唔係高空鳥瞰啦喎你o的相!!!!!

KennyT said...

你寫都咁浮誇令人即刻想去﹐好勁啊﹗你可以改名做袁可風了!

SZE said...

係喎!你d相....影得有進步呀!!
有幾分素顏影子呀!!

Irisssy said...

勁喎!!!有深淺境喎(居然)!!!!
看來你終於開竅, 可以開個攝影blog了~

袁健健 said...

素顏:
其實一直都唔係,係得你話係~

KennyT:
今篇唔算浮誇啦,收歛左喇。

SZE:
因為微博,
近日攝影技術跟繪畫技術都有進步~

Iris:
再七強調,
只要光線充足及時間充裕,
我影相都可以OK的~

UGF said...

丫...算你識貨!
我成日o係迎月食lunch的。