Wednesday 7 July 2010

大食之神話。

生活要創富我會走去UNY,而日式百貨新開張最喜歡搞限時優惠,所以前陣子一知道UNY 樂富店新開張進行試業,放工後即抱著婆仔心態第一時間深入虎穴混進師奶團群中東逛西找,務求覓得一兩件低價貨品提升成就感。

走到門口,遠眺有開店限定十元一件衣物,即時摩打腳音速步往覓食,千辛萬苦求求其其執件上手,殘殘舊舊梅梅爛爛垃垃圾圾,考古學家推敲出跟前貨品大概生於二千八百年前,即過了九萬幾季左右,不鳥它;又見一堆廢棄特價玩具,其脫節程度連樂施會助養的非洲貧童見到亦會高呼三聲幼稚,遂又閃邊去。

實驗證明,UNY 樂富店繼承著上一手吉之島傳統,不少貨品款式依舊走在時代末端。

打了個白鴿轉兩手空空,懷著餓意的決定,走落樓下新建美食廣場祭祭脾胃。

大家有聽過一個神話嗎?是這樣的,神話中相傳遙遠那遠方有一對相當大食的母子潛伏於樂富之中,鑑於自己身懷牛胃關係,一直覺得此類神話純屬誇張虛構、無稽之談,完全沒放在心上,誰不知是晚竟然真的給我巧遇傳說中的大食母子。

到神戶北之板點了至愛滑蛋豬扒定食後,就到廣場中心環形圓桌坐將起來,見鄰座胖子吃著相同東西,暗忖識貨之餘,亦警剔自己不要吃得太多,沒多久,其母提著客飯套餐坐到其身旁,二人跟我差不多同一時間起錨開餐。獨個兒吃飯實在太過無聊,吃到沒一半,又八卦一瞥母子兩戰況,只見桌上餘下細半客滑蛋豬扒飯而胖子不知所蹤,正好奇著細食的胖子真少見,胖子就捧著八番拉麵的豬骨湯拉麵粉墨登場。

上海客飯套餐、滑蛋豬扒飯定食和一大碗豬骨湯拉麵,份量足夠供三人飽餐一頓,現在只二人分吃,可謂食力驚人,但原來還不特止,當滑蛋豬扒飯遭到清盤、上海客飯接近尾聲的時候,胖子忽爾又提著單據離座,換來的,竟然是一籠小籠包和酸辣湯,鄰座二人如斯狂野豪放,嚇得我啞口無言七個一皮。

你以為這就完了嗎?細姪你實在入世未深太過天真,胖子放低一盤食物後,頭也不回再走到泰式食鋪取了一兜炒通菜和四枚椰汁西米糕才坐下繼續大快朵頤。哈哈,有菜有肉有熱湯,麵飯包甜皆不缺,營養狀甚均衡喎,但這樣重劑量又未免平衡得過左龍呀?我撐大個口得個窿在想,美食廣場內的新食店都給他一炮過試清光了。

人試菜你試菜,人家點到即止小食多滋味,你兩條友卻款款試大盤兼試到款款清盤,嗚呼哀哉,小的佩服得雙手雙腳加下肢合共五肢齊聲投地。


大家有聽過一個神話嗎?是這樣的,神話中相傳遙遠那遠方有一個單身寡佬相當八卦,用膳期間喜愛研究鄰桌吃甚麼之餘,還要對人家食物指指點點,全然不懂分莊閒,相當麻煩。

如遇此人,大家就原諒他吧,事關一個人吃飯實在太悶了。

7 comments:

仕仔 said...

我細佬話我知UNY裝修得好得, 叫我去睇下.
但對樂富居民來講就真係唔係幾好喇, 因為要捱貴野, 因為連惠康都冇埋, 所以要麼去街市買餸, 要麼去UNY超市買貴餸.

卡臣 said...

大丸有名貴雪糕糯米糍

chaumet said...

其實成篇野既重點係你唔想再一個人食飯, 哈哈, 幾時搵返個伴, 同母子二人組大戰300個回合~

Irisssy said...

……………係咪就係三河屋果日?

袁健健 said...

仕仔:
好普通咋喎,住附近街坊咪好行囉,
突登黎就大可不必了。

其實呢D野真係兩睇,貴左,但地方確實靚左,
不過無超巿確實有點擇駛。

chaumet:
大戰母女都還可以,
母子就唔好搞喇。

Iris:
係呀,
可想而知呢篇野草稿左幾耐。

puiyee said...

我愛吃神戶北之板個咖哩豬扒飯,平。

walkinginpark said...

哈。我都係最鍾意唔分莊閒食飯搭車四圍望。
生活創富已經再燃唔起我幫襯既慾望喇。
一個人食飯係幾慘既...我以前都試過...