大袋由加利。

很想買袋，真的很想買袋，遇著想買東西又苦無心水物品可以令我鬆鬆慳囊動動銀根的話，我就很想買袋來一搔心頭勁癢。

據某團體調查所得，坊間很多同道中人遇著類近情況都會選擇買鞋作避風港之用，我自己也是一名愛鞋士，買鞋頂癮大法自然甚合自己脾胃，但礙於本人愛將鞋履停泊於房間通道，鞋買得太多，就會做成阻街，街阻得太劇，就會大量囤積於細小房間造成通道進一步狹窄，一個唔好彩撞正消防人員登門造訪突擊巡查，房間勢必因通道不符合消防安全條例而慘遭票控，那就真的怒破慳囊了，所以買鞋的事，個人認為還是慎重一點比較妥當。

可能有人會質疑本人宣稱愛鞋士，卻著來著去都是那一兩對爛鬼波鞋有吹水唔抹嘴之嫌，其實箇中道理就好像愛牛士年中買了一千幾百條牛仔褲，但著來著去始終都是那條易於配襯千年唔洗的梅爛臭化牛一樣，又或與無聊閒人到超巿執了數款六包裝新品牌即食麵回家，但到頭來卻因為好日唔食一次而缺乏冒險精神，導致煮親都係食開的出前一丁麻油麵差不多，買跟用基本上是沒甚麼關係和抵觸的。

本人人橫身寬巧妙地避用個胖字，不知怎的總覺得牛高馬大一定要衣衫夠厚、手執大袋出街才顯得豪邁有型，但豪歸豪、型歸型，自己又唔係Notebook PSP 隨時跟身的都巿人，亦唔係打開八寶袋iPad iPhone 共冶一爐的科技俠，更唔係背揹三支長鏡頭六枝不同長度伸縮腳架的龍族狙擊手，不過是輕攜一枚銀包一舊傻瓜機連兩包7Days 的凡人，負載總重量加埋都不及手挽袋重量一半，如此妹仔大過主人婆，試問帶咁大個袋出街幹鳥？

當然，有心的話總可以袋件風褸扮寒底裝裝假狗，但，現時室外氣溫百九幾度喎老友，我呢類大汗人，帶件浴袍索汗就差不多。

講到尾，原來連大袋都買不了，我不依～我不依～

嗚，沒法子，只好將視線轉向岡本出品的薄質小袋身上，遇著派對狂歡，用來吹波波當氣球，都總算實用啦。