Friday 2 July 2010

完全不覺這是我迷戀嗎?

見悶悶地,又人少少,就講下世間怪奇的咸濕故事吧。

大家個圈圍細少少,個頭再哄埋我呢邊少少啦,我咁細聲講驚你地會聽唔到呀。

全人類聽到喇?好,咳咳,正式開始。

眾所周知,香港地最喜歡做調查,就好像「香港人性知識調查報告」,其頻密程度大概為半年一會左右,這些調查左調右調調得咁密究竟可以調出個甚麼味來實在唔多清楚,反正各大報章及貧苦大眾以至主辦單位皆用上八成功力投放在個別畸得不可再畸的無知個案之中,繼而得出港人性知識貧乏結論,情況就好像大家看到日本有另類宗教宣揚飲尿健康,就以為日本人都喜愛飲尿養生一樣,好天真好傻。而報章除了描述畸案,大多附帶著一個正確性知識列表,當中每次必定上榜項目,非「經常自慰不會影響健康」莫屬。

女孩子是怎麼樣的為保形象知都會扮無知,但對我來說男性「經常自慰不會影響健康」的真確性又確實值得相榷,事關據幾位男性朋友經驗所得,又好像不是這回事,其中一個案例是...

咪先咪先,唔係我自己經歷呀,真係來自朋友自身經驗架,我又唔係偶像派,試問何須用到化身去寫以上事情呢?我知坊間流傳著敏感話題主人很喜歡用《朋友等於當事人定理》去替自己遮醜,但這招其實很老土,現世代已經沒年輕人會用了。

由於本人中學時代就讀於男校關係,溝唔到女的可憐蟲自然大有人在,而我這幾位朋友,都是由當年的同學關係晉升上來的,他們中學時代溝唔到女,人大了很容易因朋友圈子狹窄關係繼承著基因繼續溝唔到女,而有關「經常自慰不會影響健康」的經驗自然就多了。

回正題,個案例其實係...

又點呀?係呀,我係一樣讀男校,而且那年代的我還猶如含羞小草一樣相當被動,但我當時有幸混入了一個厚顏無恥酷愛隨街隨處撩隔離校女學生的交友團體,還總算積落微量女性朋友導致某些心理生理偏向早熟,所以我和上述所說的可憐蟲係有斗零分別的,亦因如此,他們有的經驗,亦不代表我可以沾染得到。

講返,其實據班朋友所講...

估到架啦,你兜友實話我扮野架,實話我扮「年少輕狂,人人都有過去」架,加下我個形象就係只要我講親任何唔好的事又或出醜樣衰事都強制入我數,我越描,事情就越黑,百詞莫辯了。

算數,被打斷了三次,箇中來龍去脈已經沒有興再說下去,總之簡單一句,本人對「經常自慰不會影響健康」一說由衷的感到不確定及存疑。

正所謂有水過水、無水散水,既然水已吹盡,大家都係返房繼續工作啦。

6 comments:

Anonymous said...

好頂癮囉,成日講呢唔講呢!!!

卡臣 said...

高手的確係高手
無得呃

chaumet said...

好想當你的士咁喪踼..對住你d文筆係有暴力傾向既衝動..點呀我都係讀女校!!!

牡丹 said...

繼唱〈我是熊〉後,另一個導致"我有少少想摏你囉~"嘅念頭又油然而生喇 .....

Anonymous said...

你呢D真係高層次廢話, 講左等於冇講.

袁健健 said...

無名氏1:
有咩計唧,你地成日打斷我~

卡臣:
高咩丫,加下有人想樁我喇~~

chaumet:
唔係掛?我D 文筆唔係咁差呀?
但你冷靜D,踢的士會整親腳的。

你讀女校?讀女校識唔到男仔呢。

牡丹:
睇黎我呢篇野好易令人產生暴力傾向

無名氏2:
其實篇篇都係廢話~
全部都係低層次。