Friday 7 September 2007

《出埃及記》。

飲湯先要襯熱,睇戲,做咩要刻意選新鮮出爐又或優先場去幫襯?好戲就係好戲,拷貝用多兩星期又不見得發黃發臭影響畫面質素,首輪入場雖云全院滿座機率大增,有助增加觀映氣氛,但有品睇戲族人仍然被列入受保護動物範圍內,要全院滿座,就要為電話響過不停、鄰座跟好友舉行電影助談會及後座六合彩型搞珠式食爆谷方法產生的噪音做定三手準備,焗住選擇的話,還是冷冷清清靜英英獨樂好過,但有口話人無口話自己,星期三晚我就興緻高昂的到電影中心看HKAFF《出埃及記》的優先場,無他,因為我愛看彭浩翔,所以我要優先入場。

睇首輪原因其實咪就係咁簡單囉。



作為彭浩翔隱形忠實Fans,自從看完前作《伊莎貝拉》後,心其實都離過一兩離的,心離當然並非被《伊》的濃烈王家衛風悶親,反倒覺得靚人靚景份外迷人,但彭導演自組公司後第一套作品就撚出這種有別過往玩野拍法的電影,有陣陣洗底味道,我想,沒了玩野諗頭的彭浩翔,就好像不再是以前的彭浩翔。闊別年多,《出埃及記》好像不見了跟杜文澤合組的「不是兄弟」頭銜,但仍然繼承著《伊》的拍法,再浸入陣陣台日式藝術片感覺,看著彭導演用固定長鏡頭拍著任達華纏著張家輝,我想起蔡明亮的《你那邊幾點?》,又醒起時枝裕和的《這麼近,那麼遠》,老實講句,都幾得人驚,有睇過上述兩套名片的都知道,其醃悶靜態程度,足令尋常觀眾悶到嘔奶,托賴,《出》跟兩片只有點點拍法雷同而不拈任何悶氣,但無可否認,參展手法真的很重,甚至比《伊》更重。


放映後主辦單位安排了短短二十分鐘交流會,席間彭大導就以雪糕理論去解釋了拍法跟舊作大有不同的問題:「我鐘意食Haagen Dazs,唔代表我日日都要食Haagen Dazs,甚至餐餐都食Haagen Dazs。」,當下子想起杜琪峰前陣子出現《孤男寡女》、《瘦身男女》才來一套《PTU》的境況,還望彭大導嚐完兩啖Haagen Dazs 後,可以來一杯富豪軟雪糕清清味蕾。

順帶一提,我悔恨自己沒主動發問而喪失得到簽名海報及明信片資格,而編劇卓韻芝真人原來都OK 得的。

《出埃及記》好看與否我完全性偏私,所以毫無參考價值可言,不過電影秉承彭導風格,故事由一件荒唐事或想法去開展,尤其喜歡電影頭段,一件其實頗為荒謬的事卻用上非常認真、沒半點搞笑成份的手法去處理,又出奇的拍得出箇中懸疑氣氛,有點始料不及。今趟少了舊作很多的平鋪直敍,多了用畫面說故事,就以任達華跟劉心悠的關係就拍得很不錯,但電影去到中段,彭導老問題又再現身,全片節奏忽爾慢了起來,主打劇情沒大推進,只不停的交代著任達華周旋於溫碧霞、劉心悠與組織之間,有理由相信觀眾若然唔夠精神走入場的話,化身釣魚郎機會頗大;始終嫌彭導作品結局太過保守,《公主復仇記》、《大丈夫》以至《AV》都好像完結得唔夠過癮去得唔夠盡,今次《出》幹得好一點,但仍嫌太過內歛唔夠好玩。

《出》有不少綠葉出場,當中自然少不了每片必備老拍檔詹瑞文,不知是否詹近年被濫用得過份關係,詹Sir 在彭導作品的對白好像越來越少,由最初《買兇拍人》一大堆對白的雙槍雄、《AV》狂Rap 叔父、《伊莎貝拉》只有兩句的包租公,到現在《出埃及記》連一句對白都沒有的輪椅男,感覺反倒比其他雜碎電影的Solo 式表現更有演技。

據報彭浩翔打算將短篇作品《破事兒》拍成電影版,真希望彭能夠將成名作《全職殺手》親自拍一次,以報上回杜琪峰翻拍不中看之仇。

4 comments:

Anonymous said...

未看,所以唔可以就住部電影講...但我會看,因為我都幾鍾意彭浩翔既電影....其實我覺得伊莎貝拉幾好睇架...

搭一句嘴先...蔡藝術大導的"你那邊幾點"..我係有隻但未睇...個原因係..我睇左佢既"天邊一朵雲"...

天邊一朵雲,但片中卻有大量的乳暈....

袁健健 said...

伊莎貝拉我都鐘意,重搞到我對梁洛詩改觀添~不過我係驚佢從此以後都玩呢種風格而放棄以前有濃厚玩味既體裁唧~
照套戲睇,應該都未必會...

天邊一朵雲,起碼有無盡的乳暈。
但你那邊幾點,答案卻係半夜零時零分,一點都無得睇...
更灰。

Anonymous said...

你都講得0岩...就好似王家衛咁...越玩越曲高和寡 (當然啦,可能只係我唔明0者)...

唉...蔡大導真係極端...天邊一朵雲係三點畢露..而你那邊幾點卻係三點不露 #_#

但好似話台灣觀眾已受夠佢果一套...咁又係既..一個導演點都要照顧一下大眾口味架嘛..而佢就只一心拍d攞獎片..

袁健健 said...

唔...偷偷地講,其實我ok 鐘意睇王家衛~哈哈哈~不過模仿既就真係適可而止就夠,套套影住堆輕煙就影足三四分鐘,好快嚇走哂d 觀眾。


我諗蔡大導0係台灣都係小眾娛樂~情況同王家衛差不多,好似花樣年華、2046之類,本地票房都係麻麻,就算杜琪峰,都不見得特別好,真係唔知點解。

台灣藝術片就多,商業片出品已經萎縮得八八九九,最有印象已經數到去n年前藍色大門、刺青同說不出的袐密,話就話商業,但個種類又好似商業唔哂...咁當然啦,逃學英雄傳、蘋果咬一口就咪鬼計喇~~