Monday 3 September 2007

《賭博默示錄》漫畫版。

空間有限欲望無窮,好睇到要入手放書櫃以便隨時回味的漫畫絕對需要精挑細選,個人清單胡鬧搞笑系有《去吧!稻中乒團》,前前後後睇過十次八次,但每次內急時是但執一期入矛廁大快朵頤都總會出現笑到唔捨得出關場景,其不凡魔力,正常人難以理解,但假若要選發人心醒、啟發型漫畫,年前介紹過的《天才柳澤教授》自然榜上有名,而令一隊中必然正選首推《賭博默示錄》。

自己一向對以賭博為題漫畫零興趣,嫌其將賭博太神化故事太千篇一律,記得十數年前曾經風行一時的《賭鑊金》、《馬照跑》,看了一期半期即時棄械投降,悶死收場,但呢本《賭博默示錄》可謂賭系異數。

《賭》中很喜歡用上人渣去形容人,所謂人渣,即好食懶非、寄望僥倖,只懂得過且過渡日的窮人,而男主角伊藤開司由始至終確確實實就係一條人渣,漫畫開首就講述開司因誤當舊同事擔保人而欠下鉅款,經追債人遊說下決定登上掛名「為救贖負債年青人」而來的「希望之船」進行賭局,勝出的可以將所有債項一筆勾消,戰敗的則被送到一個不知名地方強制勞役,乍聽搏得過,但人渣就係人渣,無啦啦點會有咁大隻肥雞任食唔嬲?

《賭》中的賭局,並非一般話事啤、賭馬仔咁簡單咁熟口熟面,就以「希望之船」上的「限量式猜拳」為例,當中就包含著很多戰術及學問,作者福本伸行精心設計出種種新奇賭局來刻劃出人性,當中尤以第二章的「人肉走鋼線」最為精采,一群人渣在幾層樓高位置迫不得已用鬥快走鋼線來博取千萬鉅款,失敗的自不然墜地殘廢收場,但走完全程又如何?有錢人會做蝕本生意、會信得過嗎?而安坐地下的暴發戶們則觀賞著眾人渣以命比賽,邊飲酒作樂邊利用排名來進行賭博,人渣無膽踏出第一步即掟茄孖叉,人渣們唔係你死就係我亡之悲情,對襯著暴發戶視人命如糞土的莫情,弱肉強食表露無遺,很黑暗但又很現實,《賭》全系列就是描寫窮人如何在有錢人榨取統令下委曲求存,屬邵家臻類反政府厭富型人仕Must 睇Item。

早前提及過帶有點點《死亡筆記》感覺的《欺詐遊戲》,其實更大組成部份來自《賭》內的心理角力,對比一下,就連畫法都有點點雷同部份。《賭》未能如《欺》在港流行,大概就是衰在畫功方面,作者褔本所繪可謂毫無動感活力可言,整本漫畫字多畫醜睇小說一樣,稱之漫畫,簡直離哂大譜,但醜畫伴著黑暗色彩濃烈故事,又好像格外入型入格。

《賭博默示錄》全十三冊,屬系列的第一輯,接著還有第二輯《賭博破戎錄》及第三輯《賭博墮天錄》,第一、二輯早早在外面漫畫店睇乾睇淨,而第三輯據聞將會改篇成動畫版在十月檔期推出,還望其時可以帶起熱潮,令早前爛尾的香港版可以重新發行。

2 comments:

尖尾 said...

剛開始看你上次推介的欺詐遊戲,喂唔錯喎!

袁健健 said...

欺詐遊戲頭頭幾掂,但睇到近幾回,開始無心機睇,太兜兜轉轉太亂,好煩,情況有d 似死亡筆記後半部~