Wednesday, 8 December 2010

《復仇者之死》。


由《復仇者之死》暫名為《剖術者》開始,就對此片充滿著異樣的期待。

暗黑系人性故事乃個人偏愛,《復》當然很合河車;愛聽麥浚龍愛看其部落格,很自然會對其電影演出更為感興;我不會試圖掩飾對蒼井空的了解,但長久以來了解得太深入透徹,反倒對其穿著衣服做戲更有性趣;而最後,亦是含金量最高一個部份:我是衝著導演黃精甫而來的。

黃導出品一直以來都不被自己喜愛,起朵兩作《北京狗與唐狗》和《青梅竹馬》風格獨特但造作悶昏,《福伯》不俗,但又未到突出地步,去到《江湖》與《阿嫂》,更犯了緊絀新導忽爾暴發以致胡亂洗錢的大忌,加上想頭太大技術失敗,成品劣評如潮,亦因而沉寂墮谷數載,直到《復》才正式浮回水面。

所以今回入場,除了上述表面證供,骨子裏最想看的,就是黃導經過這段不長不短的歲月沉澱後,在電影風格與拍攝手法上有否重大轉變。

事實證明,要一個人改變,真係唔係話做就可以做得到。

《復》有著一貫黃精甫風格,電影畫面大玩異色淡色是首本花招,今次故技重施,頭十餘分鐘依舊看得我不甚舒適;思想偏激變態暴力同樣是黃的標記,個人不抗拒之餘甚至還很喜愛,可惜經黃拍出來的這起事兒,總脫不去說不出的刻意與造作;無故慢鏡、奇怪長鏡和忽然怪鏡比比皆是,賣弄畫面這個陋習始終沒能改善過來。

故事義無反顧諗到就做,全然無視邏輯並放棄將事情合理化一向最為要命,《復》沒有例外,社處初期嚴如監房鏡頭一轉卻輕易走犯、弱智女珠胎暗結但無人詢問、槍械垂手可得無法無天、殺人無需坐牢死者又全無交代等等等等,無稽無道理得無話可說,除非閣下沒帶腦袋進場,否則來到中段,很容易就會由看戲變成捉犯駁位遊戲。

或許有人會搬出睇戲唔好駁戲來作後盾,但處處離譜處處古怪兼沒意圖去解釋的話,我自問就沒法投入其中。

總括來說,《復仇者之死》比黃導過往的都來得好看,但賣弄太多缺點太多犯駁太多,我想,繼彭氏兄弟後,是時候考慮將黃氏掟入黑名單了。

4 comments:

said...

哈哈 ~ 又一次證明對事情的觀感都只不過是比較得出來的.

我都好同意你講果D缺點, 但當我一用呢套戲同阿嫂比, 我就覺得OK了(其實咩野戲同阿嫂比, 立即都變成可以攞奬既電影XDDD). 另外,我睇呢套之前睇左一套悶到甩哂D膶可以用黎打爐的他來自美國, 所以當睇到節奏較快的復仇者之死就即刻醒哂神.

素顏天使™ said...

無故慢鏡、奇怪長鏡和忽然怪鏡比比皆是 <--笑左

因為 Juno + 蒼井杏兒,我本身有諗過睇,但知道導演係黃精甫之後,真係送飛都唔想睇!

袁健健 said...

仕:
咁話分兩頭,雖然我唔鐘意呢套野既風格,
但佢又真係唔悶節奏ok明快喎

素顏:
其實唔帶腦入場的話呢套野係可以的~
同埋juno 同蒼井真係幾ok

哥斯拉 said...

早已知道Juno及井倉空演技差,本來仍然想睇,當見到導演係黃精甫,立刻打退堂鼓!果然網上一致劣評如潮。另一黑名單我選王家偉.