Wednesday, 6 October 2010

患病見真情。

有察覺到本部落格更新次數每況愈下嗎?沒法子,近月狀態不佳,感冒遲遲未能斷尾甚為虛弱之餘,西藥副作用易累易疲,以致每晚差不多十一點上床進睡,就連尋常微博亦減少參與,更柱論費力寫部落格了。

我知我知,我知口痕友此時此刻必定指著電腦螢幕高呼三聲「條友偷懶搵藉口」來大力嘲弄一餐,但...唔?甚麼?原來大家一直都沒有察覺到更新變少,由始至終只有我自己關注在意、自作多情嗎?嗚,這回當真傷心傷意傷神。

再傷也好,來來去去都係類近無謂野,還是回正題比較好。


連日來早睡關係,國慶日沒過中午人就甦醒過來,恰好友達在家附近辦事,用死聲病氣加傷風咳拜托了數回,就換來了一客油雞鵝飯和例湯作Brunch 之用,兩口子在中午時份邊分吃著燒味邊看陳年師奶劇《真情》,恍如隔世。

「《真情》究竟做左幾耐?」我問。「我記得對上一次失業已經播緊。」

「我對上一次失業好似停過一排架。」友達視點並沒有離開電視機,足見《真情》雖云老土到噴飯,但卻具吸引力。「呢,你記唔記得劉愷威叫咩名?」

「劉愷威?咪安仔囉。」我吃著飯說。「妳個人都幾怪,唔記得安仔反而記住劉愷威呢個名。」

「...隔左咁耐你都重記得角色名先係怪囉唔該。」友達視線依舊聚焦著電視機。「咁蔣志光呢?」

「師奶福,叉燒柄個仔。」

「李司棋呢?」

「善姨嘛,妳真係失憶。」我答。

「咁善姨個妹係咩名?」友達始終沒看著我。

「好姨丫嘛。」

「錯!」來到這裏,友達忽爾轉個頭來。

「錯?」對我來說這段《真情》關係幾近常識,敢肯定萬無一失。

「錯呀。」友達以挑戰者眼神看著我。

「我想講,我99% 肯定善姨個妹係好姨囉。」

「但係錯呀,絕對係錯。」

「哈~錯?」我幾近失笑。「咁係邊個?」

「惡姨。」



我沉靜了整段廣告時間,以示無聲抗議。


《真情》來到尾聲,正是我執垃圾之時。

「喂,我重有野想問呀。」友達對著我賤笑著說。

「點呀大佬?」

「頭先你講開好姨嘛。」

「又如何呢?」做過一次傻仔,任何事亦顯得格外有戒心。

「咁好姨個妹又叫咩名?」

「...又黎?」

「答啦答啦。」甚麼也還沒說,友達已逕自笑將起來。

「估到!」

「嘻嘻,係咩呢?」

「衰姨?」

「哈哈哈哈~」友達爆笑起來,但老實,全然不知有啥好笑。「路線相近,但錯。」

「...咁係咩呀又?」

「壞姨。」



為免病情加劇,下次還是不要叫友達來探病好了。

11 comments:

仕仔 said...

友達探病真係會搞到你內傷兼吐血. XDDD

chaumet said...

叫人送外賣你仲想點...下次咪唔好揀女仔送囉...呀!係wor..外賣唔係女送成件事唔成立wor~

Anonymous said...

雖然爛gag但真係笑了...

carmen

Anonymous said...

hope u feel better!!! miss your blog post!!
drink more water!!!

-whoshui

小瓶子 said...

有人送上门....种想点吖?

小瓶子 said...

sorry...系送外卖上门...哈哈...

袁健健 said...

仕仔:
有餐食,攤血都吐得抵既~

chaumet:
我唔信有仔會肯送外賣上黎囉。

carmen:
我承認登時我也笑了。

whoshui:
太好了,你令我知道人間有情,
感謝感謝~

小瓶子:
好明顯係有意地產生意外囉妳......

小瓶子 said...

好明顯係有意地响度晒命囉你.

有无顺水推舟上埋人地呢?

下一个POST可以写真情变真爱 wor !

袁健健 said...

小瓶子:
哎呀,話哂Blog連多年,竟然咁唔了解我?
如果要哂命,
我結尾一定會凝造甜蜜氣氛的,
點會開爛笑收尾?

上妳個頭~~
你估唐狗咩,話上就上~~XD

PP said...

咁爛既笑話應該岩晒你送飯先係架喎

Tung Tung said...

友達是你女友嗎? 大家都一樣咁風趣啊!