Wednesday, 31 December 2008

不正=歪。

唔想承認,但不認不認還需認,其實我鑑賞事物品味係十分之差的。

當然,品味呢回事難為正邪定分界,小眾沒幾個人欣賞的,我可以彈出一句「非主流音樂」蒙騙過去,但鐘意聽一D公認為唔識唱歌的歌手唱的歌,又究竟成何體統?我當然並非刻意捉著某幾個垃圾歌手去聽,但Random地去Play歌,正中紅心那幾首,瞄瞄歌名,竟然係Shine、戴夢夢之流,唔,愛聽Shine、戴夢夢之類的,斷估都無幾個好意思宣稱自己聽的是非主流音樂吧?

其實聽垃圾歌唔打緊,先天性排斥實力派歌曲才最令人沮喪。

李克勤、張學友之流我可以推說一句老土胡混過去;Eason 差不多的聲線亦可來一句太悶來遮風擋雨,但眾人公認的謝安琪呢?我曾經嘗試強迫自己愛上《愁人節》、《喜帖街》,但事與願違,所謂臭坑出臭草,聽極都唔明箇中樂趣在那裏,呢回事就好像愛情一樣,努力去嘗試愛上一個人到最後仍然係一拖手就想反胃作嘔的話,無謂勉強,早走早著。

記得仍然處於學生哥的青蔥歲月,一星期買兩三隻CD 都算等閒事,但來到十幾年後的今日,有買碟已經算對樂壇有交代,撞岩近兩年,確確實實係一年一隻,而好不幸,都係一個唱功幾曳的歌手,Juno,兩張碟都係Juno。

Juno 對前一隻碟《Chapal Of Dawn》實在太精采,加上新碟《Why》以歪理作主題,就令我更感興了,老實說,我生平最喜歡撚歪理,拆開《WHY》,當然期望箇中歪理有助衝擊一下我乾涸已久的思維,不過聽畢全碟,歌係承接得到《COD》的質素,但所謂的歪理,又好像跟心目中的相去甚遠,不能說不失望。

聽Juno接受無記《音樂360度》訪問時表示,《寫得太多》當中歪理佢自己就最為欣賞,登時打了一個大突「下」了出來,《寫得太多》無錯十分不錯聽,但要講到歪理,又真係不太知道歪到那裏去。麥氏解釋,假如人類沒了語言,每個人都用心及眼神去溝通,世界可會變得更簡單更好云云,是否歪理確實無可奉告,只知同樣的意念題材已經予無數人在不同媒介借題發揮過無數次,再歪都好,都不馨香,都玩謝了,都腐臭了,都玩直了。

玩古怪歪理,沒了《COD》填詞手黃偉文,真的歪唔到出樣,現世代歌手假若要食主題出歌的話,黃氏必屬最佳選擇,不過說起歪理歌,腦海中即時閃出的就是Eason N年前由林夕填的《快高長大》,相隔數年再聽,玩味新概念尤在,Eason Playlist除《一切還好》外,《快》屬第二最愛,第三最愛則屬《十面埋伏》無疑。

《WHY》碟假若洗去不太點題又或點得唔夠到弊病,質素其實都幾好的,除主打歌《寫得太多》,個人最愛就是《歪》及《嘔吐》,每當《歪》Intro 響起,總會憶起在Youtube看到Juno在《WHY》新碟發佈會邊唱邊跳的一段片,Juno勁歌熱舞,當然就係《奧瑪》、《大風吹》的時代,想起這兩首歌,又會記起當年無記每晚連載點題音樂短劇《Juno與她的故事》,當中曾經迷倒我一時的女主角嘉碧兒,妳這剎那在何方?

嘿,睇睇份Track List 來一個總結,喜愛張茵、Shine、戴夢夢、Juno加多個嘉碧兒,我想稱之為品味都有被柴台踢館危機,假若呼之為惡趣味的話,一切就來得合理岩格調得多了。

6 comments:

runescape gold said...
This comment has been removed by a blog administrator.
intelligence said...
This comment has been removed by a blog administrator.
尖尾 said...

咩唱功曳,Juno都不知幾咁正!

潤滑KY said...

尖尾,
還是覺得你最好~

167 said...

剛剛6:30~撇~來到這裡,留個言相認吓。
今日相信在你樓下幾層的一個office入面有條友冇乜嘢做,喺網上世界kill time一篇一篇有的沒的讀讀讀的時候,發現了這裡有Pon De Lion,然後也發現了《快高長大》!
喂我都好好好鍾意架!

潤滑KY said...

167:
你唔係同事,係同大廈工友咋下嘛?
但點解你會知我邊樹返工?我有文章提過嗎?

呢篇都成年幾前了~~
見到有留言都嚇一跳。