Monday 27 August 2007

《導火線》。

對於我呢類盲亨來說,入戲院遇上唔對路爛片比率幾近五成,遇岩放工後身心疲累總可以邊睡邊醒捱過去,不幸碰上精神飽滿訓唔著日子,提早離場又實在太浪費太沒原則,九十分鐘時間總要打發,最佳苦中作樂方法莫過於尋找箇中腐爛位。

爛片雖爛,但每部總有一段極短的蜜月期,蜜月期賞味期限一到,換來就是腐爛的開始,而這個令人覺得「係呢度開始知道自己入錯場喇!」場口,就是腐爛位了,就拿詹端文的《戲王之王》為例,個人認為當電影去到許紹雄七情上面的模彷卧底被害經過就是一個腐爛位,導演藉著該段光影畫面向著在場觀眾宣佈「你地賴野喇」,貨物出門恕不退換,無奈但只可接受。

入場睇有點期望的《導火線》,甫開首只見丹爺在鏡頭前坐定定以專訪形式發表「警察有否拉錯人」的偉大言論,老土肉麻到極致,心即時被急凍一大截,我在想,這難道會是一個腐爛位?假若閣下屬於樂觀份子,當然會記起咸豐年前由陳嘉上執導的《野獸刑警》用上差不多手法而又精彩絕倫,但好事唔上心,壞事卻時時刻刻掂記著,一見《導》的專訪式開首,腦海即時浮出爛片代言人《大嬴家》,觀映期間被《大》片開首時歌神許冠傑扮貓王出完千領著數條鬼佬跳舞一幕不停纏擾著,有咩辦法唔一額汗?

托賴,一切還可以,但僅此而已,《導火線》始終都不及丹爺代表作《殺破狼》令人耳目一新,《導》片不論故事和手法都帶著點點過時味道。

頭段連番運用快鏡凝造時尚型格感覺,不反感,但配合的陣陣台劇系聲效才算可怕,看著看著,猛然醒起無記的《同事三分親》,認真罪過。要談到老土,最令我毛骨悚然的必選丹爺、古天樂和肥貓聚在沙灘聊天一段,不知是畫面色彩問題抑或是日特別挑剔,總覺得對白嚴如八十年代末一大堆英雄片,眼猶未盡,還要來一幕異常兀突的晨運客齊齊落水來表達出樂觀心態,看著眾長者四萬咁口笑騎騎慢動作跑落水,即時雞皮四起。

《導》片嘗試理順劇情變得更合理,可謂吃力不討好,個人認為此舉實屬無謂,就好像歌手要勁舞就例牌咪嘴一樣,看打片,早早有心理準備劇情胡混反駁位多,與其搞一大輪腦汁仍然落得盞搞收場,倒不如來多兩三場大打特打好過,今次《導》片為了鋪排故事浪費不少菲林,相對打位變得太少分得太後,看得不夠過癮。

原諒我太挑剔,就連最精采的打鬥場面都要抹黑一下才安樂。

動作當然是丹爺監守自導,自從《殺破狼》、《龍虎門》後,其功夫架勢已經成為我的最愛,尤其其招牌式黑皮褸加上手搖搖侍機架勢,有型有款到不得了,但是晚自己不知是否眼域突然開到另一境地,在《導》片末丹爺跟鄒兆龍一段高潮打戲竟然看出兩三幕穿崩,丹爺彈弓一樣拳未有耐到肉即時縮手,鄒兆龍又隨即叫痛彈開,造假情況活現眼前,大感愕然捽捽眼,接著一拳情況依舊,難以置信,好在及後再沒有異樣出現,變方一邊腳一邊踭的「咇咇啪啪」又踢又批又掟又撻,還是很過癮的。

《導》就跟《殺》一樣充斥綠葉,但搶鏡度一般,不知是否呂良偉廿幾年前穿著「霧Folk」波鞋跟獵豹鬥快跑山的廣告太深入我心,今次重出江湖,其一字一句一舉手一投足都予我陣陣濃烈娘味,我承認這點是我的戇居偏見;相反另一奸角鄒兆龍就較得我心,夠酷又有功夫底子,假若能夠聯合回吳京三個打得之人來一場,吸引力更勝一籌,其他方面,除了刻意經營的一句「件制服唔係比你著黎威架!」有點記憶外,其餘角色如肥貓、洪天明之類,表演平平沒啥深印象,唔用力回憶的話差點忘記有份客串。

《導火線》其實算不上差,但相對於前兩部丹爺出品《殺破狼》、《龍虎門》,不知是新鮮感問題抑或對手問題,大有平均地每況愈下之勢,我想甄子丹 + 葉偉信這對組合可能處得太久了,寄望下套作品可以換換班底來一點新衝擊,為丹系打片帶來一番新景象,否則的話,就快厭了。

Thursday 23 August 2007

《向牛牛許願》。

我做事一向有始沒終,惟獨睇日劇、動畫呢回事從一而終,甚少出現睇到一半頂唔順景況,今年夏季日劇殺入直路,終於出現頂唔順中途放棄的悶劇。

《向牛許願》男方卡士我同性相拒沒興留意,只知有過氣男星中村獅童特別演出,其餘靚仔有型的一律不入眼,但眾女主角卡士卻相當吸引人,先有近期廣告女王、在《華麗一族》演木村妹妹的相武紗季,相武眼袋又黑又大但又異常可愛動人食正近期熊貓熱,前排在公司無 MSN 好用的情況下將其所有替 Donut店拍的廣告在 Youtube悉數看完,笑容充滿陽光氣,即時迷上...唉,我就係咁易;再有越睇越靚的戶田惠梨香,看過由其演女主角的春季日劇《欺詐遊戲》,內容漫畫版早早看完看透,反倒其一對又長又滑美腿若隱若現,我等麻甩仔有咩辦法唔 Keep住追看?最後有在《Smap x Smap》偶有客串的 Model香里奈,雖然以十來歲死仔包標準來說以介中女,但總算熟口熟面有韻味,越看越有親切感。

睇日劇從來以貌取人,至於劇情鋪排,講真一年有幾套係有新意?

但《向牛許願》真係老土到飛起。

頭一兩集主體講述男主角玉山鐵二的背景及牧場生態都總算撚得出新鮮感,當中尤以首集主角們合力替母牛助產一幕最為有趣,從畫面看著大大隻小牛從母牛體內中痾出來,新鮮感十足之餘亦佩服東洋劇集可以拍出如此 Discovery Channel 的畫面,有驚喜,但打後從主角們將母牛當寵物看待開始,劇情發展就越來越老土乞我憎了。

老早講過自己一向同情心、愛心值偏低,要我投入去感受六個大學生為了一頭牛的生死去喊苦喊忽,從而悟出人生真理實在完全辦唔到,東洋松屋、吉野家開得成行成市,牛肉從那裏來?唔殺牛唔宰牛,難道幾廿歲人還會天真得以為霜降牛扒真的是從降霜而來?雖云眾人親眼看著母牛誕下小牛,但母牛不能生育就要賣向肉商,殘忍,但天經地義,主角們扯著牧場主人褲腳去據理力爭,不單毫不感動缺乏感染力,還浮出陣陣戇居幼稚多舊魚意味,假若編劇設定眾主角為草食人類,咁又另當別論。

首六集就是兜兜轉轉圍撓著一隻畜牲去做故事,其間穿插著主角們的自身問題,但所謂問題,又係陳年舊橋未開波都知結尾,靚人靚景又如何?照樣悶出隻鳥來,有強勁卡士卻收視低迷,都唔好話無道理。

Sunday 19 August 2007

發酒癲武術功夫選拔賽。

無記前陣子深夜時段陸續播出各國武打、散打比賽,目的大概就是為了《2007中國功夫之星全球電視大賽》而鋪路,星期六英超場場硬戰,柴娃娃學過兩三堂太極劍的老媽卻執意扭去無記,無計,做孝子的又要照單全收。

夜宵食得多,夜粥真係未食過,對我來說熊拳長拳蔡李佛都不過係兩個空翻一套拳,打得精采唔曉欣賞,反而質素差打關斗失手墜地更具可觀性,所以呢類比賽,本身就懷著黑心去看,情況就好像看港姐看港男一樣,無騎呢人無耶魯象腿無怪臉一律缺乏動力去收看。

看畢比賽,請容我大膽無情的講一句,整個節目簡直豬狗不如,垃圾到不得了,參賽者質素如何無興趣亦無底子評論,但節目制作絕對地不知所謂,我甚至感覺到全場瀰漫著濃烈臨時拉夫甚至不尊重參賽者味道。

無記究竟用甚麼準則去挑選司儀?男司儀做過無數套電影武術指導又做慣主持,被選為司儀可以理解(但不代表稱職),但連痴脷筋的過氣港姐都被看上就真的匪夷所思,痴脷筋正常不過無啥好歧視,但無記台前幕後幾十個崗位唔去安排,偏偏執意將其放在靠把口搵食的司儀位置上,行徑令人費解。

司儀的誤選錯配在訪問環節中可見一班,涉及到功夫武術,兩岸三地參賽者自然少不了,偏偏兩位司儀諷刺地不諳國語,男司儀用廣東話問完一堆笨問題後對方隻字不明,原以為女司儀會充當翻譯來達成互補發揮作用,誰不知男司儀即時就嘔出一堆不知是否故意玩野的王晶式國語,大佬,你以為家下係關智斌忽然被有線娛樂台拉著做訪問嗎?堂堂一個大台,勢估唔到無左一個利嘉兒真係無人曉國語,又,就算真係無人曉,又為啥不事先跟參賽者夾定問題以便聽唔明都曉答?這壓根兒就係無記準備不足求求其其了事所致。

不過老實講句,訪問環節其實要唔要都罷,集武辛唔辛苦之類笨問題都可以接受,但去到最後男司儀竟然彈出「成日問武術功夫既野都悶啦」,跟著就懶詼諧問「假如你成為武打巨星,你會以李小龍、成龍定錢嘉樂做學習對象呀?」,對方答了,就哈哈笑的鬧哄著,帶著陣陣譏諷意味,我明白這可能出於監製指引搞氣氛,但家下唔係選港男港女,做咩要搞氣氛?有心做有心推廣的,倒不如慳番啖氣介紹一下各拳各法各門派的分別,又或分析一下何謂打得好何謂打得差更有用,我等一介無知平民,真係會睇完《千機變》就以為阿嬌打得兩嘴的,你唔講唔介紹一下箇中精妙,鬼知。

節目中間穿插著彭冠期舞棍間場及介紹一段由郭羨妮拍的短片,男司儀聽後又彈出「即係有靚女睇啦,講野要到 Point嘛」,差點沒以為自己在收看 Now電視的冰火台;人家少林大師表現中指篤爆石頭依然懶好笑的彈出「大師,呢個手勢唔出得街架喎」,意猶未盡,繼續大講特講,惹得身邊一向不多言的女司儀終於按耐不住出口「我地靜少少比師父集中精神啦」,耳根立時變得清靜,亦令女司儀有分加。

原以為稱職的男司儀練功練到走火入魔一樣不停東拉西扯胡言亂語,相反女司儀少做少錯恰如其份表現沒Over,實在始料不及。

其實莫論司儀,節目本身都問題多多,行內人可能看得出各參賽者功夫上的分野,但試問香港地星期六晚有幾多練武人仕孖住電視機看比賽?睇都睇英超啦,不講解一下就無厘啦更的選出優勝者,坐在電視機前的一干人等一律不明箇中原因,只知女參者姿色尚可。

細看一下原來是晚只屬選拔賽,根據事態發展未來必定出現準決賽、決賽,究竟無記又會搞出一個怎麼樣的大龍鳯,這可能比節目本身更具吸引力。

Monday 6 August 2007

《Die Hard 4.0》


回憶集體統一化的年代,睇《Die Hard》,應該都算係集體回憶了。我個世代,就連我呢類男性荷爾蒙偏低人仕看畢《洛奇》、《虎膽龍威》後,都不禁笠住白背心走落街跑番兩轉充當三數個字男子漢,其影響力之深遠可想而知,所以當經典回歸,二話不說即時仆入場集體回憶一番。

荷里活 B級片最常見橋段首推殺人魔、喪屍異變莫屬,勝在大橋易諗又大堆藉口灑鹽賣血,套套熟口熟面,又出奇地睇親都盡慶離場,皆大歡喜,相同信條用在官能動作片的話,恐怖份子就頂替了喪屍殺人魔成為曝光率最高奸角,《Die Hard 4.0》乃最典型官能動作片,上述條款自然不可劃決,今回恐怖份子搭上電腦黑客入侵國家系統搞破壞,我小人地認為導演想借此重申《Die Hard》系列跟得上時代發展才走上黑客之路,但橋段乍似新潮實則陳年老土,遠在古早前由發瘟溫兆倫主演的港產片《信有明天》已經有類近橋段,為尋找新思維而入場人仕請移玉步到隔離映院覓第二春。

橋係舊,但作為老主顧依舊照單全受。

《4.0》全片百多分鐘,導演大概只用了開首五分鐘來交代事件源頭,其後不斷出現三分一大炸、十分一勁炸場口,其中首推主角麥堅殺入行車隧道再飛車撞直昇機一幕,又癲又狂,睇得人熱血沸騰,另一幕布斯韋里士大戰 Maggie Q 亦係一絕,布斯從兩三樓被打跌落街,有仇報仇樓梯懶得行直接隨處搶車直撞上樓,喪到無以復加地步,勿以為這都是濫炸無內涵,典型動作西片,就應該有這種係唔係都爆的勇氣,所謂邏輯,求求其講得通就可以,最怕新派動作片來回穿梭一大堆文戲悶戲來試圖將全片合理化,弄得兩家茶禮都食唔盡,何苦?

主角麥堅的燥底特色布斯演得駕輕就熟無啥好挑剔,惟獨大反派稍嫌未夠陰險乞人憎,可能全片大量篇幅描述麥堅歷險過程,奸角的「功績」反倒有點被忽略,始終此類英雄主義味濃的電影,作為大反派的沒多餘色心又或不親手幹番兩三件掃射平民的行為都不能算是稱職,沒了痛心疾首的犯眾憎行為,觀眾投入感減半,所以當主角幹掉奸狗時,一點罪有應得的心情都沒有,反倒有種「咁雞架條大佬」的感覺;電影另一賣點 Maggie Q,老實講句,一向對其有嚴重偏見,看畢全片,印象分依舊未能跟演技成正比,仍舊得我憎,搵佢演反派最岩我口胃。

散場,做完 Spa一樣精神爽利身心愉快,官能片就應該有這種療效才稱得上成功,今次《Die Hard 4.0》已經爆得好狂、玩得好盡,假若未來日子還要再拍第五集的話,火箭穿梭機相信走唔甩了。

Friday 3 August 2007

死囚窩。

一個月無現身,彷如隔世。

我未死,但假若一星期有兩三餐如下述食法的話,有心人大可攜同燒肉切雞上寶福山,話唔定趕得切飲小弟半山豪宅入伙酒。

七月正值炎夏走入大直路之時,莫說短衫牛仔褲走入人群,就連單拖一條底橫軟攤家中亦敵不過三四十度高溫弄得混身是汗,不過熱歸熱,邊爐局卻反常地接二連三的出現,踏入七月,已經先後出席四場邊爐宴,密度比起年頭大寒來得更強更勁,局外人當然無法理解,當事人如我,都覺本末倒置。

擇地旺角與大角咀交界的骨煲皇,地點隔涉兩頭唔到岸,由先達啟程足十五分鐘步程,在場人仕無不流得一身熱汗,其實大熱天時打邊爐又有幾出奇?渾身是汗的走入店內不消五分鐘已經被吹得乾爽,感覺好像無帶一樣,悠然自得,慶幸在場沒盧冠庭之類人仕,否則邊爐宴必定臨時夭折,為環保絕食去也。

雖云骨煲皇,但又並非跟豬隻有仇得只供應骨煲,但有心踩場連人家響朵之作都唔邂逅一下又好像於法不合,跟夥伴倆就點了個小的豬骨窩(多芹菜)滾一滾。

叫小,但對兩個人來說已經被小得幾大鑊的了。


渣流攤的所謂豬骨煲吃得太多,要麼料少湯淡乏善足陳,要麼豬肥肉潤得窩面呎幾兩呎油足夠另起大鑊炸豬扒,兜兜轉轉的中過幾次招,對其好感度可謂蕩然無存,但骨煲皇的,又好像真的比較優質像樣。

好一個有求必應侍者,揭開窩蓋,入目的先是一座芹菜山,翻開芹菜面紗有數舊栗米、數舊蘿蔔、一大堆豬骨等堆得迫迫狹狹,感覺對辦,再呷一啖湯,味精與否一向分辨不來,不過相比起健康啖如水,還是這裏的有味水合自己脾胃。據聞豬骨煲要有筒骨的才稱得上正宗,這裏的要另加錢才會奉上,正派人仕可能大叫昆水,但自己一向鍾情於奀妹之類軟骨系人仕,見煲內取以代之的乃大量豬軟骨,自然吃得更高興。



牛肉總共分了三款價錢,今次點了五十元的中價本地牛,花紋脂肪欠奉但肉質軟腍有味,比起上回跟家人窩局的九十八元上價切牛差別不大,兩者擇一的話,前者就抵吃得多,至於最廉宜的美國肥牛,見鄰枱食剩一樣一碟得三來片,有心食肉的話,幾草野請勿慳皮。

肥爆雞腸甫跌落火窩,湯面即時浮出一大堆黃油,其油潤肥美程度,隱隱可見雞油上飄出黃黃輕煙,黃煙團團聚著,形成骷髏頭狀,係人係狗都知道,呢條野唔係人人都玩得起。夾起一望,腸衣包脂肪屬閒話家常,但肥到兩者身份對調脂肪包腸衣又真的聞所未聞,跟夥伴吞啖口水衝開心理障礙,手起筷落沾上醬油往嘴裏一啪,脂肪即時遊走於口腔每一角落,呢條野,肥到飛起,但其鮮味之濃郁又冠絕了過去廿多年來食臟物的經驗,假若眼前彈出一碗白飯,單單一條肥野就足以幹掉大半碗了,不過同樣地,一條足夠幹掉一晚跑步成果,一邊食一邊感覺心臟負荷好像越來越重,健康果然跟美食各奔前程。


貴為螄蚶狂熱者,一向逢蚶讚好,但這裏的,又真係特別好。

年前試過在九龍城某泰菜店遇到外貌偏黃、腐掉了的泰式螄蚶,其腐臭味畢生難忘,但到骨煲皇,真的可以放心食用,螄蚶上枱前已經被店方清理過洗刷好,到上正場一陣海產鮮味撲鼻而來,不禁令人食指大動,將之夾入窩中灼八秒即放入口,蚶兄肉爽嫰滑,陣陣海產鮮味濃烈得好像海浪一浪接一浪兜口兜面打過來,鮮得無話可說,好此道者,一定愛不釋口;味鮮之餘,體積之大又係一個大關鍵,一碟八隻,每隻大概半隻手掌大小,試過一次一碟只得四隻但大至跟手心相若,食螄蚶扒一樣,才三十元一客,過癮之至。

其餘還點了水餃、芝士腸、蟶子,六碟碟頭不少的窩料還有一大窩豬骨,試問區區倆口子又如何可以將之安然幹掉?奮戰兩句多鐘,最後死剩少堆豬骨少堆雞腸,已經算超額完成。

埋單六碟窩料連湯底、啤酒汽水各一合二百五十多元,屬四人份量,計落真的幾抵幾超值,不過一邊食肥膩豬骨、一邊啃肥爆雞腸,一邊又灌啤酒,老實講,我真係諗過會死。

假若未來幾年患上冠心病、肥胖症之類頑疾的話,呢餐好可能就係染病導火線,至於源頭,一定係雞腸,容我再講一次,雞腸真係肥得好緊要,肥到兩星期後的今日依然活在內疚當中。

好內疚。

名稱:骨煲皇
地址:大角咀杉榭街2-16號金基大廈6號地舖