Monday 5 January 2009

《死亡預告》。

近年對好多一直以來喜歡做的都忽爾間失去興趣,寫blog 動力消失、搵食試餐慾望流失,就連閒來無事睇戲娛樂都沒往年的熱烈,這一種興味上的突變,有時我會諗,其實我係咪得左絕症就黎死呢?

就好像年尾新人為報名爭獎急急腳湊夠數出碟一樣,我當然唔係甚麼樂壇新人,但亦既無聊又白痴的訂立每月入院睇兩套電影指標,近月年結數數票尾發現今年入院數目未達指標,就求求其其的搵戲睇希望追回零八年進度填番條電影數,撞岩鍾愛的日系電影近年尾特別多,揀揀下,又竟然重新燃起我潛藏以久的戲慾。

其實《死亡預告》絕非為湊夠數而入場,早早在九月的亞洲電影節已經有意慾買飛入場,但識我的都知道,我是一個既麻煩又懶的人,要懶起上黎真係可以懶得好緊要,當時想起要專程於某日搭車到AMC 入場就大倒胃口,最終放棄了。

托賴事後《死》有上正場,否則就白白錯失了一套好戲。



單看片名,《死亡預告》顯露若干中田秀夫驚憟鬼片感覺,記起中田秀夫一系列過時拍鬼片手法,又會產生起陣陣卻步念頭,情況就跟許冠文重拾戲癮拍笑片一樣,場或者會照捧,但心態似上山奔喪送佢最後一程多於期待笑餐飽囉。《死》片其實甚麼都不是,入到場不單止驚唔出樣,到散場更加係九成人眼紅紅、六成人淚眼汪汪喊到一句句的,我承認當中包括自己在內,但究竟是九成人中抑或六成人當中,打死都唔會預告。


漫畫版自己老早看過,而電影版導演瀧本智行很厲害的選取了當中三個最為人感動又深刻的故事出來做成真人版,箇中故事進展跟原作差不多,編劇只將三個故事作適度調節串連一起以免散亂打亂節奏,若然將三個故事以《陰陽路》形式去展現,癮頭又好像會差一點點。

入場前沒太理會演員陣容,只知由日劇《欺詐遊戲》男主角松田翔太擔演派送「逝紙」的主角,但入到場一邊睇,才發現《死》演出陣容尚算厲害。

不論漫畫版抑或電影版,我最喜歡的單元就是由山田孝之和成海璃子主演的兄妹情故事,想當年在公司上網看完這故事後雙眼通紅泛起淚光,假如作者落多兩錢肉緊多加兩句催淚語句,眼淚相信就不止在心裏流咁簡單了。談及演技,我想有件事需要申報,雖云相隔年幾沒寫所謂的影評,但品味依舊沒啥進步之餘,封建時代遺留下來的思想更愈加柢固,我總認為,外語人(香港=中國,國語不在外語之列)係永遠識做戲、外語人係永遠識唱歌的,就好像前陣子DL 了日系動畫聲優的音樂節目,聲優者,配音員也,原先還以為聲優除了某幾個如水樹奈奈之類曉唱歌外,其他都應該很不中聽,但看著聽著他們又跳又唱,竟然又覺得OK、無問題喎,事後上網作自我檢討才發現,其實聽在人家耳裏己經係甩哂走哂音了,只不過自己對外語不敏銳又沒音感,發覺不到問題罷了。同樣事情照辦煮碗套落演員身上,我觀戲不算太少,但要我講出外語人邊位最唔曉做戲,真係諗爆腦都諗唔出一個所以來,外國的月亮不是特別圓,只是自身視野太窄太狹而已。

我想講既係,山田跟成海的一段兄妹情演得十分討好又感人,全院眼淚大概有60% 為他們而流的,其感染力可想而知,縱然看過漫畫知道結果,但要來始終要來,忍不住又滴了數滴男兒淚。想當年成海在《一公升眼淚》演妹妹時己經深得我喜愛,到近年日劇雖然少見了,但電影卻越演越多,感覺順利,我想不是我特別留意所以錯覺成海越做越上力吧?一向重女輕男,所以自從《電車男》後,就沒再看過山田演出了,家下久別重逢,搞咩鬼佢會肥左咁鬼多架?雄壯身型加上雙下巴畢現,感覺跟長瀨智也一樣,同為肥仔降受害者。

除了兄妹情,有塚本高史坐鎮、講述兄弟情的一個單元亦係催淚重災區,作為打頭陣的一個故事,我最初不單止面紅,而係雙眼通紅的頂著一個個催淚彈飛射過來,但長路漫漫還有那麼多的風浪,截得住眼眶遊離著的淚水,跟著又如何應付不停泄出分泌物的久旱淚線?捱到最後,聽著塚本在台上唱著那首歌,結果怎樣無謂講,只知現場尤如感冒重災區一樣,嘶嘶雪雪之聲從未間斷過,

關於議員與兒子間感情的故事反倒是全片中印象最淡的一個,雖云故事別具意義有矛盾批判意味,但始終人都是犯賤的,驚開個頭後尾唔驚再有意義都係不完美,同樣地,喊開左個頭後尾唔慘更有意境都覺美中不足,我等凡人天性如此,非戰之罪。

今年看過不少日片,繼《烏冬》後,《死亡預告》是另一套令我留有深印象的電影,《死》片不似《導盲犬小Q》類為催而催的慘片,箇中背後故事意念亦是一個很有趣的課題,看完電影版後不妨再看看漫畫版,對啟發思維應該有若干幫助。

4 comments:

Anonymous said...

場或者會照捧...
嘩!我真係睇緊合家歡。

袁健健 said...

往事只能成追憶~

Anonymous said...

where you come from!

袁健健 said...

法國L.A 果邊。